14 vite më parë në bulevardin “Dëshmorët e Kombit”, aty ku duhej të ishte vendi më i sigurtë, mes dy “qeverive”, Legjislativit dhe Ekzekutivit, 4 protestues paqësorë u vranë me urdhër të ish-kryeministrit që më pas fshiu filmimet, manipuloi provat dhe pengoi drejtësinë.
Dhjetëra u plagosën, qindra të tjerë u dhunuan në bulevard dhe në komisariate. Nuk thuhet shpesh por Gjykata ka dënuar mbi 100 pjesëmarrës të demonstratës së 21 janarit.
Askujt nuk i gjeti armë, dinamit, shishe molotov, çadra pistoletë, i dënoi sepse ashtu kishte dashur urdhëruesi i vrasjeve të 21 janarit. Shteti “i tyre” i dënoi, pasi i rrembeu rrugëve dhe i torturoi.
Në kalendarët e historisë së shqiptarëve ka plot ditë të tjera shumë më të përgjakshme se 21 janari, por kjo e janarit, përveç gjakut ka në ballë edhe turpin, ngaqë shënohet në kalendarin e bardhë të të ashtuquajturës demokraci brenda kornizës së BE-së dhe NATO-s.
Ishte i rëndë dhe i turpshëm 21 janari i 2011, por gjithsesi më pak i rëndë dhe më pak i turpshëm se këta që erdhën pas.
Vrasësit janë ende prepotentë, të paprekshëm. Ata vranë katër vetë teksa po mbanin duart në xhepa dhe tani që njohim karakterin e pushtetit të tyre, ai akt kriminal, thjesht, u shtohet historive të përgjakura qeverisëse në arkivat e njerëzimit.
E dinë të gjithë si fshehën gjurmët e krimit me shuarjet e filmimeve, ndërrimet e tytave, injorimet e prokurorëve.
Sivjet, 21 janari ulurin dhe çirret!
Pritet sërish të mbulohen me lule hipokritësh njollat e gjakut të përfytyruar në vendet ku u gjendën shtrirë ata të vrarët me duart në xhepa. Dhe do të dërdëlliten të njëjtat premtime.
Prokurorë të SPAK!
Qëroni dhe kthjelloni 21 janarin 2011! Dhe ta shikoni sa e thjeshtë është reforma juaj e famshme e drejtësisë!
Jepini paqë pikëllimit të 21 janarit dhe do ta shikoni se reforma është bërë vetvetiu! Se ai 21 janar, e ka një fajtor. Gjithë Shqipëria e di. Edhe ju e dini. Për më tepër, familjet e viktimave kanë ende besim tek ju. Është besim prekës, a e ndjeni?
