Nga Fatos Tarifa
Disa ditë më parë botova në këtë gazetë një opinion titulluar: “Autoritarizmi nuk vjen gjithnjë me çizme”.
Sot, pasi mësova lajmin mbi porositë e kryeminstrit Rama dhënë ministrit të tij të Drejtësisë Toni Gogu për kryetarin e burgosur të Bashkisë së Tiranës Erion Veliaj, aty për aty më erdhi ndër men Otto Georg Thierack, ministri hitlerian i drejtësisë nga viti 1942 deri në rënien e regjimit nazist, më 1945.
Thierack ishte një nazist fanatik dhe e vuri sistemin gjyqësor në Gjermani në shërbim të drejtpërdrejtë të politikave represive të Hitlerit. Ai mbahet mend në histori për shndërrimin e drejtësisë në instrument të pushtetit totalitar.
Ç’po ndodh kështu në Shqipëri! Do lejojmë që këto metoda fashiste të minojnë sistemin tonë të drejtësisë?
Ku janë miqtë e mi deputetë të Partisë Socialite në Kuvendin e Shqipërisë, të cilëve u kam dhënë votën deri më sot të më përfaqësojnë?! Po deputetët e tjerë socialistë? Pse bëjnë sehir çfarë po ndodh në këtë vend?
Pse heshtin? Pse nuk flasin kundër përdorimit të metodave të tilla autoritariste nga kreu i partisë së tyre dhe i qeverisë së këtij vendi?
Frika, heshtja dhe pasiviteti i tyre do i bëjnë ata bashkëpunëtorë dhe bashkëfajtorë nëse lejojmë instalimin e një regjimi autoritarist në Shqipëri, shenjat e të cilit kanë filluar tashmë të shfaqen qartë.
Thoiji Jo me guxim këtyre metodave autorirariste, që nesër, mbi ndërgjegjen tuaj të mos rëndojë faji i bashkëpunimit me të keqen dhe të mos mbani mbi vete njollën e turpit politik dhe moral.
As partia, as qeveria dhe as Kuvendi nuk janë pronë e një njeriu të vetëm. Ju nuk përfaqësoni një individ në pushtet, sado frikë të keni prej tij. Ju përfaqësoni Sovranin e vërtetë të këtij vendi, popullin shqiptar dhe luajalitetin tuaj ia detyroni vetëm atij — Popullit dhe interesave të tij. Askujt tjetër.
Rasti i fundit — kërcënimet skandaloze të kryeministrit, përmes ministrit skandaloz të Drejtësisë, ndaj kryetarit të zgjedhur të Bashkisë së kryeqytetit është një tjetër ogur shumë i keq.
Të mos i mbyllim sytë para së keqes. Kujtoni fjalët e gazetarit antifashist çek Julius Fucik, shkruar gjatë burgimit të tij nga nazistët: “Njerëz, ju kam dashur. Jini vigjilentë!”
