Nga Johana Lubonja
Në numrin e saj të parë për këtë vit, Dita i kërkoi Prof. Tarifës t’u përgjigjej disa pyetjeve në formën e një pyetësori të tipit “Proust Questionnaire” dhe mori këto përgjigje prej tij:
– Profesor Tarifa, u bë kohë pa j’u parë në ndonjë prej studiove televizive. Arsyeja?
– Kohë e humbur.
– Politikanët tanë?
– Sa më shumë i bien gjoksit, aq më kokëulur e të kërrusur janë.
– Ka shpresë?
– Shpresë nuk kanë vetëm të pashpresët.
– Amerika?
– Një paradoks. Po ajo Amerikë, por jo e njëjta.
– Europa?
– Dikur qendër e botës, sot në kufijtë periferikë të saj.
– Shqipëria?
– Ka ndryshuar. Sa herë bën dy hapa para, bën një hap pas. Një metaforë që dëshmon progres.
– Shumë njerëz e mohojnë këtë progres.
– Jo të gjithë shohin dhe kuptojnë qartë. Ka njerëz qe lindin me sy dhe për nje kohë shohin, por vervohen e vdesin të verbër.
– Vazhdoni të shkruani çdo ditë?
– Po, me përjashtim të ditëve kur nuk shkruaj.
– Lexoni çdo ditë?
– Njëlloj siç marr ushqim. Pa lexuar, mendja nuk zhvillohet. As krijon. Njëlloj si trupi, mendja do ushqim.
– Shkrimtari më i preferuar?
– Hemingway. Por ky nuk është i vetmi. Janë shumë.
– Muzika apo piktura?
– Të dyja, nëse janë artistikisht të arrira.
– C’lloj muzike?
– Jazz. Blues.
– Piktura apo skulptura?
– Piktura më shpesh, skulptura më gjatë.
– Basketbolli apo futbolli?
– Njëri më i bukur se tjetri. I kam luajtur dhe i shoh si njërin dhe tjetrin.
– Teatri apo kinemaja?
– Nuk janë e njëjta gjë.
– Shokë?
– Pak.
– Miq?
– Shumë.
– Udhëtoni?
– Në Shqipëri, kudo. Kryesisht në jug.
– Jashtë vendit?
– Kam udhëtuar shumë. Afër dhe larg. Përsëri udhëtoj. Afër dhe larg. Ndonjëherë mendoj se do vdes në një udhëtim. Uroj diku afër 😊.
– Udhëtimi juaj më i paharruar?
– Janë shumë. Vështire të veçoj një.
– Cila periudhë historike ju është dukur më interesantja?
– Periudha a Artë e Athinës dhe Iluminizmi.
– Rrjetet sociale?
– Nuk i kam të nevojshme.
– Politika?
– Një profesion i domosdoshëm. Dhe një formë arti. Fatkeqësisht, jo kushdo që e ushtron është profesionist i mirë dhe i ndershëm.
– Tirana?
– Edhe kur jam larguar për periudha të gjata prej saj, jam kthyer në këtë qytet. I call it Home.
– Gjirokastra?
– Një magji. Për mua, një second home.
– Fëmijët?
– Djemte i kam shokë, fëmijët e tyre, një nip dhe dy mbesa, engjëjt e mi.
– Dreka apo darka?
– Kryesisht darka, por varet ku dhe me kë.
– Ditëlindjet?
– Nuk i festoj.
– Pse?
– Ç’kuptim kanë?
– Shenja e horoskopit?
– Ma thoni ju. Lindur në gusht, si edhe im atë dhe të dy djemtë e mi.
– Rinia?
– Për disa, pjesa më e gjatë e jetës, që i paraprin një pleqerie të shkurtër, por të lumtur; për të tjerë, një periudhë e shkurtër, që i le vendin një pleqërie të gjatë, por shpesh të palumtur.
– Kuptimi i jetës?
– Një zgjedhje individuale.
– Lumturi e plotë?
– Asgjë nuk është kurrë e plotë. As lumturia, as vuajtja.
– Frika më e madhe?
– Varfëria.
– Çfarë çmoni më shumë te njerëzit?
– Urtësinë, vetëpërmbajtjen dhe sinqeritetin.
– Çfarë nuk pëlqeni më shume te të tjerët?
– Narcizmin dhe mungesën e sinqeritetit.
– Keni gënjyer ndonjëherë?
– Do ju gënjeja nëse do të thoja jo. To lie is human.
– Motoja juaj?
– Don’t let the bastards grind you down!
