Qendra e Shërbimeve të Arsimit nxjerr notat e marra nga maturantët edhe për provimin e matematikës dhe lëndës me zgjedhje. Maturantët mund të aplikojnë gjatë dy ditëve në vijim, për të marrë kopjen e korrigjuar për secilin nga tre provimet e detyruara dhe lëndën me zgjedhje
Një kopje e testeve të korrigjuara mund të merret edhe për provimet e detyruara dhe lëndën me zgjedhje të zhvilluara nga maturantët e sezonit të vjeshtës. Ndonëse nuk do të ketë rivlerësim të testeve, autoritetet e Qendrës së Shërbimeve të Arsimit kanë konfirmuar ditën e djeshme se edhe maturantët e pakënaqur me notat e provimeve të sezonit të dytë, do të mund të aplikojnë në afatet e caktuara për të marrë një kopje të testit të vlerësuar për secilin provim. Pranimi i kërkesave për fotokopjen e testeve do të bëhet përgjatë dy ditëve të ardhëshme, dhe sikundër ndodhi edhe në provimet e qershorit, e gjithë procedura do të zhvillohet online në portalin qeveritar “e-albania” sipas hapave të konfirmuar.
“Në zbatim të rregullores së Maturës Shtetërore, të gjithë maturantët dhe kandidatët e tjerë që kanë dhënë provimet e detyruara dhe lëndën me zgjedhje të sesionit të dytë (vjeshtës), kanë të drejtë të kërkojnë fotokopjen e testit dhe të fletëpërgjigjes, pas përfundimit dhe shpalljes së rezultateve të të gjitha provimeve. Çdo maturant apo kandidat që kërkon kopjen e testit dhe fletëpërgjigjes përkatëse, duhet të kryejë aplikimin online në portalin e-albania, duke përdorur shërbimin “Kërkesë për kopje të testit të Maturës” për të gjitha provimet, në periudhën 15 dhe 16 shtator. Pas trajtimit të kërkesës, autoritetet përgjegjëse do të nisin kopjen e testit dhe të fletëpërgjigjes për secilin kandidat që e ka kërkuar atë, e cila do të gjendet tek “Hapësira ime”, seksioni “Dokumentet e mia”, në llogarinë përkatëse që maturanti ka në portalin qeveritar ku dhe ka bërë aplikimin”, bëjnë me dije ekspertët e Qendrës së Shërbimeve të Arsimit rreth procedurës që do të ndiqet për lëshimin e kopjes së korigjuar të testeve të vjeshtës.
Tashmë procesi i korigjimit të të gjitha provimeve të sezonit të vjeshtës ka përfunduar, ku krahas notave të marra në testin e letërsisë dhe të gjuhës së huaj dje janë bërë publike edhe notat e marra nga maturantët në lëndën e matematikës dhe provimin me zgjedhje. Për t’u njohur dhe verifikuar notat e marra në lëndën e matematikës dhe lëndës me zgjedhje ju duhet të kërkoni në listat e shpallura nga QSHA në adresën www.qsha.gov.al, ID-në tuaj, përbri të cilës janë shënuar në mënyrë të detajuar nota e përshkallëzuar, si dhe nota përfundimtare me të cilën jeni vlerësuar në secilin prej këtyre provimeve.
Ekspertët e Qendrës së Shërbimeve të Arsimit vijojnë të konfirmojnë se nuk do të ketë proces rivlerësimi, pavarësisht faktit se maturantët mund të kenë në duar kopjet e testeve të korrigjuara. Kjo sipas tyre ndodh për vetë faktin se skema e vlerësimit ka qenë tejet e sigurtë, duke qenë se çdo test i maturës ka kaluar në duart e disa vlerësuesve, çka e redukton në zero mundësinë për gabime në procesin e vlerësimit.
Sipas procedurave të përcaktuara, të gjithë maturantët që në sezonin e provimeve të vjeshtës kanë arritur të marrin nota kaluese, do të mund të aplikojnë për vijimin e studimeve të larta në universitetet publike dhe ato private, nëse plotësojnë kriterin e mesatares minimale të konkurimit të përcaktuar nga Këshilli i Ministrave, si dhe kriteret specifike të përcaktuara nga vetë institucionet e arsimit të lartë publik sipas programit të studimit që ofrojnë. Nota mesatare për pranimin në institucionet e arsimit të lartë përllogaritet si mesatare e thjeshtë e treguesve, si vijon: “mesatarja aritmetike e thjeshtë e notave përfundimtare vjetore të lëndëve për të gjitha vitet e shkollimit në arsimin e mesëm të lartë, mesatarja aritmetike e thjeshtë e notave të provimeve të Maturës Shtetërore”.Kjo kategori maturantësh do të mund të garojë vetëm për kuotat e lira të Raundit të dytë që do të zhvillohen pas pak ditësh.
Aktualisht po vijon procesi i regjistrimit të fituesve të shpallur në Raundin e parë. Sot nis faza e shtatë dhe e fundit e regjistrimit të fituesve në çdo degë të universiteteve publike dhe private. Dokumentacioni i nevojshëm që duhet të paraqisni pranë sekretarisë mësimore (përkatëse) për t’u regjistruar duhet të përfshijë: Fotokopjen e dokumentit të identifikimit (kartë identiteti ose pasaportë), fotokopjen e noterizuar të diplomës së Maturës Shtetërore ose e dëftesës së pjekurisë, së bashku me certifikatën e notave ose të një deftese/ diplome tjetër studimi të fituar jashtë vendit dhe të njesuar në QSHA, si dhe deklaratën e cila plotësohet nga aplikanti në mjediset e sekretarisë mësimore të fakultetit në momentin e regjistrimit. Po ashtu në dosjen e regjistrimit duhet të paraqisni edbe dy fotografi personale në formatin e caktuar, si dhe mandatin e pagesës së tarifës së regjistrimit
Në përfundim të datës 15 shtator, pas zhvillimit edhe të procesit të ç’regjistrimeve, institucionet e arsimit të lartë do të bëjnë publike vendet e lira, për të cilat do të garohet gjatë aplikimeve të Raundit të dytë, pjesë e të cilit do të jenë edhe maturantët që morën provimet në sezonin e vjeshtës.
Procedura që do të ndiqet për kopjen e testeve të korigjuara:
Identifikohuni si qytetar në portalin qeveritar duke hyrë në adresën www.e-albania.al
Zgjidhni shërbimin “Aplikim për kopje të testit të maturës/fletëpërgjigjes së maturës” dhe klikoni butonin “Përdor”.
Plotësoni të gjithë të dhënat e nevojshme të kërkuara në formular (shkolla, DAR/ZA, provimin përkatës, adresa) dhe dërgoni aplikimin.
QSHA-ja njoftohet në sistemin AMS për kërkesën e ardhur dhe verifikon të dhënat e dërguara nga aplikanti.
Pas trajtimit të kërkesës, QSHA-ja nxjerr kopjet e provimit të maturës dhe materialin PDF të skanuar ia nis aplikantit te “Hapësira ime”, në seksionin “Dokumentet e mia”.
Ju do të njoftoheni dhe me e-mail, në kohën që shërbimi ka përfunduar.
Koha e nevojshme e marrjes së shërbimit është nga 10 deri në 25 ditë.
