Rama kërcënon protestuesit: Do përndiqen nga hija e shtetit, po studiojmë uljen e moshës së dënimit penal

Kryeministri Edi Rama dhe Ministrja e Arsimit, Mirela Kumbaro, kanë zhvilluar një takim me drejtues të gjimnazeve të Tiranës.

Gjatë fjalës së tij, kryeministri kërcënoi sërish protestuesit, duke thënë se dëmet e shkaktuara gjatë protestave do të paguhen nga vetë ata që i shkaktojnë, ndërsa paralajmëroi se përgjegjës do të jenë edhe prindërit e nxënësve apo të miturve.

Ai iu referua veçanërisht rasteve të dëmtimit të trotuareve dhe hapësirave publike, duke argumentuar se fondet që përdoren për riparimet mund të ishin shfrytëzuar për investime të tjera në shërbim të qytetarëve.

“Interesa të lidhura me natyrisht paranë, me politikën, me pushtetin, në kuptimin e nevojës ulëritëse për të përdorur këtë shqetësim social dhe për ta kthyer në valë gurësh për të rrëzuar qeverinë me imponimin e dhunës, gjë që s’ka për të ndodhur kurrë, por që rëndon në mënyrë dramatike në psikologjinë e qytetarëve. Krijon idenë se këtu po digjet e gjithë Shqipëria, ndërkohë që ky është një sulm i organizuar në një perimetër të mirëpërcaktuar, që orkestrohet nga duar që janë të stërvitura për këtë punë, që ushqehet me benzinë si një zjarr i brendshëm nga aktorë të huaj. Kjo kuptohet dhe tani po bëhet një çështje e madhe në të gjithë Europën. Është një luftë hibride që funksionon sepse bazohet te shqetësime reale, jo te fantazira. Sigurisht që janë reale shqetësimet për të nesërmen e sigurt në raport me strehimin dhe mundësitë për të patur më shumë”, tha Rama.

Kryeministri tha gjithashtu se qeveria po shqyrton edhe mundësinë e uljes së moshës për përgjegjësinë penale, një çështje që po diskutohet edhe në vende të tjera te BE.

Rama komentoi edhe çështjen e arrestimeve, ku tha se gjykata i ka konsideruar këto arrestime të ligjshme, ndërsa nënvizoi se do të shohin edhe mundësinë e uljes së moshës për dënimin penal.

“Gjykata i ka konsideruar arrestimet, e ligjshme. Prindërit nuk do mbeten jashtë kësaj përgjegjësie, për të paguar dëmet që bëjnë fëmijët e tyre. Kjo nuk shkon kështu. Është i mitur dhe nuk duhet të mbajë përgjegjësi. Ky është instrumenti i forcës së shtetit. Na duhet instrumenti i këmbënguljes së shtetit”, tha Rama ndër të tjera.

Kryeministri tha ndër të tjera se me këto protesta po krijohet ideja sikur po digjet e gjithë Shqipëria, por sipas tij, këto tubime janë të organizuara nga duar të stërvitura për këtë punë.

Rama foli edhe për përplasjet mes policisë dhe protestuesve, duke thënë se deri më tani janë lënduar rreth 200 efektivë policie, të cilët kanë marrë ndihmë mjekësore në spital. Sipas Kryeministrit, janë më shumë efektivë të lënduar, ndërsa protestues janë rreth 80.

Kryeministri pretendoi gjithashtu se më pak se gjysma e protestuesve të lënduar janë studentë, ndërsa pjesën tjetër e cilësoi si të rinj që, sipas tij, janë të maskuar dhe të paguar për të sulmuar policinë.

Në deklaratën e tij, Rama nuk la pa përmendur edhe rolin e mësuesve duke kërkuar kështu një moment reflektimi në mbështetjen e eksperiencës së tyre. Për arsimin parauniversitar, Rama tha se së bashku me Ministren e Arsimit dhe me disa këshilltarë të tjerë është dakordësuar ideja që mësuesit të shkruajnë një ditar të detajuar të këtyre ditëve si një analizë e asaj se çfarë po ndodh.

Kërkesa e tij, ka të bëjë me qëllimin për të pasur mozaikun e një historie dhe për të kuptuar se ku duhet një ndërhyrje, e cila do të vlejë sapo të qetësohet situata aktuale në të cilën ndodhet Tirana.

“Në çdo rast dhe për çfarëdo arsye që kërkohet komunikim me mua apo me qeverinë, ne jemi aty dhe jemi gati. Unë përcjell çdo mesazh që më vjen, te ministrat. Jo më pastaj të dëgjoj ata që kanë nevojë të më thonë atë që mendojnë. Le të hapim këtë diskutim, jam i gatshëm pa kushte të dëgjoj këdo dhe kudo. Por me këtë nuk ka shans, kur përdor këtë, mundësitë i ka dy, ose të shpëtojë falës maskës ose këmbëve të shpejta, ose të përgjigjet para ligjit. Po punojmë për një paketë masash, kush shkatërron duhet të paguajë”, tha Rama.

j.l./ dita