Mungesa e kryeministrit Edi Rama në seancën e sotme të Kuvendit për interpelancën e kërkuar nga opozita lidhur me akuzat e ngritura për çështjen McGonigal ka shkaktuar kaos. Deputetët opozitarë kërkuan prezencën e kreut të qeverisë dhe jo ministren Elisa Spiropali.
Gjatë fjalës së tij në Kuvend, Gazment Bardhi tha se nuk ka kërkuar interpelancë me hijen e kryeministrit.
“Kryeministri nuk mund të fshihet pas Elisës, Agron Nezës, apo Mc Gonigal. Ai duhet të vijë këtu dhe të japë llogari. Pezullo seancën plenare, ushtroi postin si kryetare e Kuvendit, jo si kukull dhe thirre kryeministrin të vijë këtu. Ju duhet të silleni si kryetare dhe thirre në seancë se boll është fshehur. Nuk pranoj të bëj interpelancë me hijet e kryeministrit. Kjo nuk është interpelancë, por është sjellje si e pandehur e kryeministrit të Shqipërisë”, tha ai.
Ministrja e Shtetit për Marrëdhëniet me Parlamentin Elisa Spiropalin, e cila do të flasë në emër të kryeministrit për këtë çështje, tha se opozita po tenton të nxjerrë konkluzione për një hetim që ka nisur në SHBA dhe kjo praktikë shtoi ajo është shumë qesharake.
“Ju personalisht, a kërkoni sqarimi mbi çështjen, a doni të zbardhet e plotë? Nguti juaj i dëshpëruar për të nxjerrë konkluzionin për një hetim në SHBA është më së paku qesharak. Keni dy javë që gërricni nervat e shqiptarëve”, tha Spiropali.
j.l./ dita
