Kryeministri Edi Rama përmes një postimi në ”Facebook” ka ndarë pamje nga pritja e tij gjatë vizitës në Tokio të Japonisë. Rama shkruan se mikëpritja e veçantë nga homologia e tij japoneze është shenjë respekti për Shqipërinë e ndryshuar tërësisht në sytë e botës.
“MIRËMËNGJES dhe me mirënjohjen për mikpritjen e veçantë me ceremoninë e lartë shtetërore në Tokyo, shenjë respekti për Shqipërinë e ndryshuar tërësisht në sytë e botës, ju uroj një fundjavë të mbarë”, shkruan Rama.
Rama në kuadër të vizitës së tij në Japoni, zhvilloi një konferencë të përbashkët me kryeministren e Japonisë, Sanae Takaichi. Ai u prit në një ceremoni zyrtare sipas protokollit japonez.
Prania e tij u shoqërua me ekzekutimin e himnit shqiptar dhe himnit japonez, si edhe me tingujt e marshit tradicional japonez, që përmban elemente të kulturës së ishullit.
Rama gjithashtu pati një takim me studentë në Universitetin e Kombeve të Bashkuara në Tokio ku gjatë fjalës së tij foli lidhur me rrugëtimin e Shqipërisë drejt anëtarësimit në BE. Rama theksoi se integrimi i Ballkanit është nevojë strategjike edhe për vetë Europën.
Sipas tij, Shqipëria ka dëshmuar që është partnere e qëndrueshme dhe e besueshme. Ndër të tjera ai theksoi se Shqipëria e do BE-në dhe këmbëngulë të “martohemi” me të.
