Hetimet e FBI-së mbi dyshimet se Donald Trump pati lidhje me Moskën, gjatë fushatës presidenciale të vitit 2016 janë të mbushura me pasaktësi.
Këtë e konstaton raporti i konsulentit special John Durham, që shfaqet tepër kritik mbi mënyrën se si FBI ka hetuar mbi këtë çështje.
Në raportin 306 faqësh, John Durham thotë se FBI nuk ka pasur asnjë provë për lidhjet mes Trump-it dhe Moskës përpara nisjes së hetimeve.
Ai konstaton se hetuesit e zyrës federale hetimore të Shteteve të Bashkuara nuk kanë bërë analiza, për indiciet dhe të dhënat që kanë marrë përmes shërbimeve sekrete, për të testuar vërtetësinë e tyre.
“Departamenti i Drejtësisë dhe FBI dështuan në misionin e tyre të rëndësishëm, të ruajnë me rreptësi, besnikërinë ndaj ligjit”, përfundon raporti.
Pas publikimit të këtij raporti, ish-presidenti Donald Trump shkroi në rrjetin e tij social Truth se “publiku amerikan u mashtrua”.
Megjithatë, publikimi i këtij raporti pritej që në 2019-ën, një vit para zgjedhjeve presidenciale. Dhe nëse do të ishte publikuar në atë kohë, Joe Biden mund të kishte shumë më pak shanse të zgjidhej president i Shteteve të Bashkuara.
o.j/dita
