Në Maqedoninë e Veriut do të zhvillohet sot, 2 nëntor, raundi i dytë i zgjedhjeve lokale.
Të drejtën e votës e kanë 1,013,357 votues nga mbi 1.8 milion votues të regjistruar në listë, për të zgjedhur kryetarët e 33 komunave, përfshirë edhe Shkupin.
Një ditë më parë votuan të sëmurët, të burgosurit dhe personat në arrest shtëpiak, kërkesat e të cilëve janë pranuar nga komisionet komunale zgjedhore, raporton Alsat.
Zgjedhjet lokale do të monitorohen nga 1,569 vëzhgues, nga të cilët 904 janë vendas dhe 651 janë ndërkombëtarë.
Monitoruesit kanë të drejtë të vëzhgojnë punën e KSHZ-së, Këshillave Komunale Zgjedhore dhe këshillave zgjedhor në vendvotime, duke shënuar gjetjet e tyre por pa penguar punën e organeve zgjedhore.
Në balotazh janë edhe disa komuna shqiptare, ku përplasja më e fortë është mes koalicionit të AKI-së, të udhëhequr nga Bashkimi Demokratik për Integrim i Ali Ahmetit, dhe koalicionit të VLEN-it.
Këtu përfshihet Tetova, ku do të përballen kandidatët e dy blloqeve shqiptare – Bilall Kasami nga koalicioni opozitar VLEN dhe Bajram Rexhepi nga Aleanca Kombëtare për Integrim.
Në Kërçovë, qytetarët do të zgjedhin midis kryetarit aktual nga BDI-ja, Fatmir Dehari, dhe kandidatit të VMRO-DPMNE-së, Aleksandar Jovanovski.
j.l./ dita
