Me vetëm pak minuta në dispozicion dhe një “klik” mund të përfundoni procedurat e regjistrimit pranë mjekut të familjes, i cili do të ndjekë në vijimësi ecurinë e shëndetit tuaj. Sikundër ndodh me shumë shërbime të tjera, tashmë edhe aplikimet për regjistrim tek mjeku i familjes mund të bëhen lehtësisht nëpërmjet portalit qeveritar “e-albania”, ku mund të bëni jo vetëm regjistrimin për herë të parë, por mund të kërkoni edhe ndryshimin e mjekut të familjes në rast se jeni regjistruar më herët.
Procedurat online mund të kryhen nëpërmjet shërbimit “Regjistrim i individit pranë mjekut të familjes”, në potalin online www.e-albania.al . Në rast të aprovimit të kërkesës mjeku i familjes do të bëjë pajisjen me kartelën personale të qytetarit, dhe do të kryejë regjistrimin e tij në regjistrin themeltar të banorëve të cilët i mbulon me shërbim shëndetësor.
Hapat që duhet të ndiqni për regjistrimin!
Lidhur me procedurën se si duhet të veproni, autoritetet sqarojnë se çdo person që nuk është i regjistruar pranë një mjeku familjeje, që është edhe hallka e parë e shërbimeve mjekësore publike, duhet që fillimisht të hyjë në portalin qeveritar “e-albania” dhe të bëjë identifikimin përkatës, duke vijuar me zgjedhjen e shërbimit të listuar si: “Regjistrim i individit pranë mjekut të familjes”. Pas këtij veprimi, do të shfaqet edhe formulari elektronik përkatës, në të cilin do të duhet të plotësoni me shumë kujdes të dhënat e përcaktuara, duke përzgjedhur mjekun tek i cili doni që të bëni regjistrimin. Me përfundimin e hedhjes së të dhënave të kërkuara, ju duhet të bëni edhe dërgimin e formularit të plotësuar tek mjeku që ju keni kërkuar të ndjekë ecurinë e shëndetit tuaj. Lidhur me afatet e shqyrtimit të kërkesës për regjistrim për herë të parë tek një mjek familjeje, autoritetet e shëndetit sqarojnë se brenda pak orësh do të mund të mësoni nëse aplikimi juaj pranë mjekut të përzgjedhur është pranuar apo refuzuar.
“Në rast se kërkesa juaj do të aprovohet, ju do të jeni pjesë e listës së individëve që trajtohen me shërbim shëndetësor nga mjeku që ju keni përzgjedhur. Në rastet kur kërkesa juaj për regjistrim pranë mjekut të familjes është refuzuar, ju do të njiheni me arsyen e refuzimit, dhe me pas mund të kryeni sërish aplikimin për t’u regjistruar pranë një mjeku tjetër familjeje
procedurat e regjistrimit”, sqarojnë autoritetet e shëndetit. Për të marrë këtë shërbim online, nuk nevojitet dokumentacion shoqërues, ndërkohë që koha e marrjes së përgjigjes finale është brenda 72 orësh, dhe vendimi i pranimit do të jetë pa afat.
Po ashtu, edhe të gjithë qytetarët e interesuar, nëpërmjet këtij portali mund të kryejnë edhe procedurën për ndryshimin e mjekut të familjes dhe transferimin pranë një mjeku të ri familjeje. Sipas kushteve të përcaktuara, ccdo qytetar ka të drejtë të përzgjedhë vetëm një mjek, si dhe të ndryshojë mjekun e familjes brenda mjekëve të Qendrës Shendetësore të njësisë administrative ku qytetari ka vendbanimin e përhershëm.
Për të përfituar shërbimet mjekësore nga skema e sigurimeve shëndetësore, duhet të pajiseni me kartën e shëndetit, që po ashtu mund të merret edhe nëpërmjet portalit qeveritar. Kështu, nëse jeni pensionistë, invalidë, veteranë, të punësuar, të vetëpunësuar, të siguruar vullnetarisht, fëmijë, gra shtatzëna, persona që trajtoheni me ndihmë ekonomike, punëkërkues, etj, me anë të kartës së shëndetit mund të përfitoni nga skema e sigurimeve shëndetësore, duke filluar nga recetat e rimbursueshme, shërbimi te mjeku i familjes, te mjeku specialist, në qendrat spitalore, pra në të gjithë sistemin tonë shëndetësor publik.
Sa i takon rimbursimit të barnave, personat e siguruar, ose nuk paguajnë fare, ose kanë një pagesë të pjesshme që shkon deri në 50 për qind të çmimit të barnave, por jo më shumë. Kategoritë si: pensionistë, invalidë të plotë, fëmijë 0-12 muaj, të sëmurë me CA, TBC, të verbër përfitojnë falas alternativën e parë të çdo bari të përfshirë në listë. Kategoritë si: veteran dhe invalidë të luftës, përfitojnë falas në masën 100 për qind të gjitha barnat e listës së rimbursueshme, si dhe të gjitha barnat e tjera të regjistruara në Republikën e Shqipërisë.
Hapat si të bëni regjistrimin online për mjekun e familjes
- Fillimisht duhet që të logoheni në portalin qeveritar e-albania.al dhe të bëni identifikimin si qytetar.
- Zgjidhni shërbimin “Regjistrim i individit pranë mjekut të familjes”, si dhe klikoni butonin” Përdor”.
- Plotësoni të dhënat e kërkuara në formularin elektronik.
- Përzgjidhni mjekun pranë të cilit kërkoni të regjistroheni.
- Klikoni butonin “Dërgo” në fund të formularit.
- Kërkesa juaj do të dërgohet për shqyrtim tek mjeku i familjes që keni përzgjedhur për regjistrim.
- Ju do të njoftoheni me mesazh, me email dhe tek “Mesazhet e Mia”në rubrikën “Hapësira Ime” në portalin e-albania për aprovimin apo refuzimin e kërkesës suaj.
- Me anë të numrit të gjurmimit më cilin pajiseni në përfundim të aplikimit tuaj, ju mund të gjurmoni në çdo kohë statusin e aplikimit, ku do të informoheni nëse aplikimi juaj është në proces, aprovuar apo refuzuar me arsyen përkatëse nga mjeku i familjes.
- Në rast se kërkesa juaj do të aprovohet, ju do të jeni pjesë e listës së individëve që trajtohen me shërbim shëndetësor nga mjeku që ju keni përzgjedhur.
- Në rastet kur kërkesa juaj për regjistrim pranë mjekut të familjes është refuzuar, ju do të njiheni me arsyen e refuzimit, dhe me pas mund të kryeni sërish aplikimin për t’u regjistruar pranë një mjeku tjetër familjeje.
- Nëse për marrjen e njoftimeve ju dëshironi të përdorni një adresë tjetër email apo numër telefoni, mund të kryeni ndryshimin në rubrikën “Hapësira Ime” duke klikuar: Ndrysho të dhënat e llogarisë.
