Nuk duket se ka shpresë për lehtësimin e trafikut. Sipas të dhënave nga Drejtoria e Përgjithshme e Shërbimeve të Transportit Rrugor (DPSHTRR), në mars u regjistruan për herë të parë 7,891 automjete në vend, me një rritje prej 15% në krahasim me të njëjtin muaj të një viti më parë. Ky është dhe rekordi historik i regjistrimeve të reja të automjeteve që është shënuar ndonjëherë në mars.
E njëjta tendencë konstatohet për të gjithë tre mujorin e parë. Përveç janarit, kur regjistrimet ranë me 7.6%, në shkurt ato u rritën me 20.6%.
Në tremujorin e parë, në vend janë shtuar në rrugë gjithsej rreth 22 mjete të reja, pjesa më e madhe të cilave autovetura, me një rritje prej 8.4% me bazë vjetore. 87% e këtyre makinave që u regjistruan për herë të parë ishin me naftë, benzinë, apo gaz, çmimi i të cilave u shtrenjtua ndjeshën në mars, me naftën që i kaloi 220 lekë, nga 175 lekë/litës në shkurt, benzina u rrit me 6 lekë (181 lekë litër) dhe gazi me 15-20 lekë për litër, duke arritur në 75 lekë litër.
Edhe tremujori i parë ka shënuar nivelin më të lartë të regjistrimeve të makinave në histori.
Numri i mjeteve aktive, që qarkullojnë në rrugët e vendit arriti në fund të marsit në gati 1.07 milionë, nga të cilat rreth 860 mijë janë autovetura.
Koreja e Jugut kryeson, Kina konsolidon vendin e dytë
Sipas të dhënave nga DPSHTRR, Koreja e Jugut ka vijuar të mbajë kryesimin, në tremujorin e parë, me 24% të totalit të mjeteve të regjistruara për herë të parë që kanë ardhur nga ky shtet. Ky është viti i tretë që Koreja e Jugut është shteti më i preferuar për të blerë makinave për shkak të alternativave ekonomike që ai ofron.
Kina është në vend të dytë për herë të parë këtë vit. Në janar-mars, nga ky shtet erdhën gati 4 mijë automjete, ose 18% e totalit. Rritja e Kinës është e lidhur me interesin e shtuar për mjetet elektrike.
Në vend të tretë është Gjermania, me 12.9%, e ndjekur nga Italia, me 12.3%.
Trefishihet importi i makinave elektrike
Interesi për makina elektrike është shtuar vitet e fundit, por ritmet e rritjes rezultojnë se u përshpejtuan në mars, pasi kriza në Lindjen e Mesme çoi në shtrenjtimin e ndjeshëm të karburanteve.
Në mars, sipas të dhënave të DPSHTRR u regjistruan për herë të parë 1252 mjete elektrike, nga 898 në shkurt dhe 814 në janar.
Në total, për janar mars u regjistruan 2964 mjete elektrike, nga të cilat 2764 ishin autovetura. Mbizotëron marka kineze BYD, me 2046 regjistrime të reja për janar-mars.
Në krahasim me tremujorin e oaerë të 2025-s, regjistrimet e makinave elektrike janë trefishuar.
Pavarësisht interesit në rritje, pesha ndaj totalit vijon të mbetet e ulët, me 13% të regjistrimeve të reja për janar-mars që ishin elektrike, teksa vijon të dominojë nafta, e pas saj benzina. Në 2025-n, importet e mjeteve elektrike përbënin 5.7% të totalit.
j.l./ dita
