Pas ngjarjes së rëndë te TCH, vjen një reagim edhe nga Kleviol Ahmeti, reperi i njohur me pseudonimin ‘Cllevio Serbiano’, i dënuar më parë për avionin me drogë në Divjakë, i cili ka folur për sulmin e ndodhur ndaj medias vizive, ku si pasojë e të shtënave me armë zjarri mbeti i vdekur roja Pal Kola. Në një video të postuar në rrjetet sociale, Kleviol Ahmeti pretendon se efektivë të forcave RENEA kanë zbarkuar në shtëpinë e tij në Lushnjë, për të kryer kontrolle pavarësisht se ai vetë nuk ndodhet në Shqipëri. “U vra roja në Top Channel dje, dua t’i them familjes së vetë ngushëllime për fatkeqësitë. Po mirë ore Top Channel, a unë ua vrava rojën që më vjen policia në shtëpi mua në 4 të mëngjesit?!”, shprehet ai. Gjatë një bisede me njërin prej shokëve të tij, reperi ka bërë me dije se efektivë të RENEA-s i kanë shkuar në shtëpinë e tij në Lushnjë për ta kërkuar si të dyshuar për ngjarjen. Por ky i fundit prej ditësh ndodhet në Itali dhe në banesë janë gjendur vetëm familjarët e tij, të cilët janë shqetësuar nga kontrollet e befasishme.
