Reshjet e ditëve të fundit kanë lënë pas dëme të shumta në mbarë vendin. Ka rrugë të shkatërruara dhe toka bujqësore të përmbytura.
POGRADEC
Rruga e re Qukës-Qafë Pllocë e inauguruar dy muaj më parë ka pësuar shembje të konsiderueshme, në segmentin mbi fshatin Rrëmenj. Mjaftoi një stuhi për të sjellë pirgun e interteve në rrugën e sapo asfaltuar. Është ndërhyrë nga kompania e mirëmbajtjes por ende një korsi është e bllokuar përgjatë 1 km. Ndërsa në pjesën tjetër të rrugës qarkullimi vijon normalisht.
GJIROKASTËR
Reshjet e dendura të kanë shkaktuar dëmtime serioze në infrastrukturën rrugore të Gjirokastrës. Rruga Asim Zeneli, që lidh fshatrat Saraqinishtë, Tranoshishtë, Krinë dhe Asim Zeneli, është dëmtuar si pasojë e prurjeve të mëdha të ujit nga mali.
DELVINË
Uji është tërhequr nga Delvina e Finiqi, por dëmet nga përmbytjet e një dite më parë janë të shumta. Në hyrje të qytetit të Delvinës, dherat kanë zënë poshtë dy makina. Tre fshatra janë ende në izolim pasi ura u shemb një ditë në parë në Kakodhiq.
VLORË- FIER- LUSHNJE
Lumi Vjosa ka dalë nga shtrati në zonën e Novoselës, duke përmbytur tre banesa që ndodhen në brigjet e lumit si dhe tregun e gjësë së gjallë, poshtë urës së Mifolit dhe Lumi i Semanit ka dalë nga shtrati në zonën e Ngurëzës së Vogël dhe Imshtës, duke përmbytur 180 hektarë tokë bujqësore brenda argjinaturës. Janë evakuuar stanet me bagëti e gjedhe.
LEZHË-MIRDITË
Në lagunën e Vainit vijon operacioni i ndërlikuar për mbylljen e argjinaturës e cila pësoi shkarje mbrëmjen e së mërkurës. Sipërfaqja e përmbytur është rritur, ku disa banesa janë izoluar dhe rrugët janë bërë të pakalueshme në zonën e Myltes dhe Barbullojës. Banorët shprehen mjaft të shqetësuar, pasi niveli i ujit po vjen gjithnjë në rritje.
Zejmeni, Barbulloja, Spiteni, Rrila, Myltja, Talja dhe Grykë Lumi janë fshatrat me të ekspozuar ndaj përmbytjeve. Ndërkohë, në Mirditë është shembur rruga që lidh fshatrat e Kaçinarit me qytetin e Rrëshenit, duke lënë në izolim dhjetëra banorë. Siç shihet në pamje, rrëshqitja është masive duke e bërë ndërhyrjen tepër të vështirë.
DIMAL – BERAT
Në bashkinë Dimal në vendin e quajtur Dafinat ka prezencë uji në 5 banesa në katet e para dhe 2 banesa të tjera janë në fshatin Çiflik. Në fshatin Arrës dhe Çiflik janë përmbytur rreth 13 ha toka bujqësore. Ndërsa në fshatin Veterrik të Beratit janë përmbytur rreth 80 ha me ullishte dhe toka bujqësore. Po ashtu 1 banese është përmbytur në fshatin Moravë.
MAT- BULQIZË
Në rrugët nacionale Burrel – Skuraj dhe Burrel – Rrëshen ka pasur rrëshqitje të dherave dhe lëvizja kryhet me vështirësi. Bllokimi i kanaleve kulluese e ka rënduar më tej situatën, ndërkohë nuk ka asnjë kompani për mirëmbajtjen e këtyre akseve. Dalja e përroit të Urakës në fshatin Bruç rrezikon përmbytjen e disa banesave për shkak të prurjeve të shumta.
Në Bulqizë, prej afro një jave terminali i autobuzave të linjave interurbane dhe të fshatrave është nën pushtetin e ujit. Po kështu kalohet me vështirësi rrugën që lidh dy lagjet e qytetit të Bulqizës.
