Reshjet dhe acari bllokojnë zona të shumta të vendit, parashikimi i motit për ditët në vijim

Temperaturat e ulëta dhe reshjet e dëborës kanë përfshirë gjatë ditës së dielë të gjithë zonën malore në Veri të Shqipërisë, duke krijuar probleme në qarkullimin rrugor, por edhe jetesën e mijëra banorëve.

Autoritetet njoftuan se, për shkak të reshjeve të dendura të dëborës, është ndërprerë qarkullimi në disa prej akseve të rëndësishme rrugore si aksi rrugor Fushë Arrëz -Iballë, aksi rrugor “Bypass-Qafë Murrizë” në Dibër dhe aksi rrugor Kir- Shosh në Bashkinë e Shkodrës.

Të bllokuara mbeten edhe një numër i madh i rrugëve rurale në bashkitë Shkodër, Pukë, Fushë-Arrëz, Kukës dhe Dibër.

Gjatë paradites ka patur vështirësi në qarkullimin e automjeteve përgjatë Rrugës së Kombit, në segmentin nga Tuneli i Kalimashit deri në pikëkalimin kufitar të Morinit.

10 borëpastruese, të firmave kontraktore, punojnë pa ndërprerje në këtë segment të rëndësishëm rrugor, që lidh Shqipërinë me Kosovën, në përpjekje për të shmangur bllokimin dhe lehtësuar lëvizjen e automjeteve dhe udhëtarëve. Borëpastrueset po punojnë edhe në akset e tjera rrugore si atë Bogë-Theth dhe në Vermosh të Malësisë së Madhe.

Për shkak të kushteve të rënduara atmosferike dhe rreziqeve te mundshme, policia ka shtuar praninë e efektivëve të policisë rrugore dhe patrullave të përgjithshme në segmentet më problematike, me qëllim monitorimin e qarkullimit të automjeteve, parandalimin e aksidenteve dhe ndihmën për përdoruesit e rrugës në nevojë.

Temperaturat e ulëta, era e fortë dhe reshjet e dëborës, kanë krijuar probleme edhe në furnizimin me energji elektrike. Thuajse të gjitha bashkitë e zonës veriore raportuan gjatë ditës së sotme ndërprerje të energjisë.

OSHEE njoftoi se, grupet e saj të specialistëve ndodhen në terren për riparimin e defekteve, por vazhdimi i reshjeve të dëborës dhe stuhitë e erës e kanë vështirësuar së tepërmi punën për riparimin e shpejtë të linjave të dëmtuara të energjisë.

Zona malore në Veri të Shqipërisë përballet, thuajse çdo vit, me vështirësitë e shkaktuara nga moti gjatë periudhës së dimrit. Terreni malor, bllokimi i herëpashershëm i rrugëve që lidhin fshatrat me rrugët kombëtare, shoqëruar me nivelin e lartë të varfërisë dhe investimet e pakta, në krahasim me pjesën tjetër të vendit, vazhdojnë të nxisin largimin e banorëve, sidomos të rinjve, drejt zonave të ulëta të vendit dhe emigrimit.

Sipas të dhënave zyrtare nga INSTAT, përgjatë periudhës 2011-2023, Qarku i Shkodrës ka pësuar një rënie të popullsisë me 28.3 përqind, ndërsa Qarku i Kukësit me 27.3 përqind, duke regjistruar kështu rënien më të madhe të popullsisë përgjatë 12 viteve të fundit.

Sipas parashikimeve, reshjet do të spostohen drejt jugut të vendit. Meteorologia Lajda Porja tha në Euronews Albania se situata do të jetë problematike me reshje të dendura shiu në Durrës, Elbasan, Vlorë ku pritet të bjerë deri në 100 mm shi.

Duke nisur nga e hëna reshjet do ndalojnë por do të ketë rënie të menjëhershme të temperaturave. Ditët më të ftohta pritet të jenë e marta, e mërkura dhe e enjtja.

j.l./ dita