Pasi zgjedhjet presidenciale në Turqi shkuan në balotazh, ku raundi i dytë do të mbahet në 28 maj, ka ardhur edhe reagimi i kandidatit kryesor i opozitës, Kemal Kilicdaroglu, rivali kryesor përballë Erdogan.
Nëpërmjet një videoje të publikuar, Kilicdaroglu u bën thirrje mbështetësve të tij që të mos dëshpërohen dhe thekson se do të punohet pa ndërprerje për të fituar zgjedhjet.
Ndërsa në fund të reagimit të tij, përplas dorën në tavolinë në shenjë vendosmërie për të garuar në raundin e dytë përballë Erdogan. “Njerëzit e mi të dashur, që nga dje po punojmë pa ndërprerje. Mos u dëshpëroni. Unë do të ngrihem, dhe do t’i fitojmë këto zgjedhje së bashku. Në fund të çdo gjëje fjalën do ta thotë vetëm kombi ynë”, shkruan Kemal Kilicdaroglu në ‘Twitter’.
Më herët mediat prestigjioze ndërkombëtare vlerësuan se me shumë mundësi Erdogan do jetë fituesi i balotazhit, për shkak se i bëhet situata më e lehtë dhe njëkohësisht është njohës i mirë i sistemit elektoral, ku e nis me avantazh ndaj rivalit, edhe për shkak të influencave që do krijohen dhe aleancave të reja.
