Rusia ka përgjuar NATO-n prej dekadash? Amerikanët zbulojnë në kompjutera virusin “Snake”

Autoritetet amerikane hapën një rrjet të fshehtë kompjuterësh të komprometuar, që agjentët e sigurisë ruse ndërtuan dhe i kanë përdorur për të spiunuar anëtarët e NATO-s për vite me radhë, zbuloi të martën Departamenti i Drejtësisë.

FBI arriti të prishë një rrjet global kompjuterësh që ishte komprometuar nga një “malware i sofistikuar” i njohur si “Snake”, tha Departamenti i Drejtësisë në një deklaratë.

Për ta bërë këtë, agjencia kreu një operacion të autorizuar nga gjykata për të çaktivizuar Snake në kompjuterët e komprometuar duke përdorur një mjet që udhëzoi malware-in të shkatërrohej vetë.

Për gati dy dekada, një njësi brenda Shërbimit Federal të Sigurisë së Rusisë (FSB) – pasardhëse e KGB-së së kohës sovjetike – ka përdorur Snake për të synuar dhe vjedhur dokumente të ndjeshme nga sistemet kompjuterike në dhjetëra vende në mbarë botën, duke përfshirë anëtarët e NATO-s, – tha Departamenti.

“Ne e konsiderojmë Snake si mjetin më të sofistikuar të spiunazhit kibernetik në arsenalin e FSB-së”, tha Agjencia e Sigurisë Kibernetike dhe Sigurisë së Infrastrukturës (CISA) në një këshillim të martën.

“Globalisht, FSB ka përdorur Snake për të mbledhur inteligjencë të ndjeshme nga objektiva me prioritet të lartë, si rrjetet qeveritare, objektet kërkimore dhe gazetarët”.

CISA detajoi një rast specifik ku agjentët e FSB-së arritën të përdorin Snake për të “qasur dhe shfrytëzuar dokumente të ndjeshme të marrëdhënieve ndërkombëtare, si dhe komunikime të tjera diplomatike” përmes një viktime në një vend të paspecifikuar të NATO-s.

Brenda SHBA, FSB ka “viktimizuar” disa sektorë, duke përfshirë objektet qeveritare, prodhimin kritik, shërbimet financiare, arsimin, organizatat e medias dhe bizneset e vogla, tha këshillimi.

Sipas një deklarate të FBI-së, agjencia ka punuar me partnerë të inteligjencës amerikane dhe qeveri të huaja për të hetuar se si funksiononte Snake.

a.q./dita