Kryeministri i Kosovës, Albin Kurti ka komentuar vendimin e Beogradit për të lejuar qarkullimin e automjeteve me targat zyrtare të Republikës së Kosovës.
Gjatë mbledhjes së fundit të qeverisë së Kosovës, Kurti, siç shkruajnë mediat kosovare ka deklaruar se ky vendim i Serbisë vjen për të ulur presionin nga Bashkimi Evropian për zgjedhjet jo të rregullta dhe jo demokratike që u zhvilluan një fundjavë më parë në Serbi.
Sipas tij, para dy vitesh Serbia përdori çështjen e targave për të tensionuar situatën e sigurisë në veri të Kosovës.
“Ndonëse i shërben lëvizjes së lirë e të lehtësuar të dy shteteve, dua të theksoj se ky vendim po vjen pas një moszbatimi më shumë se 10 vjeçar të marrëveshjeve paraprake. Përdorimi dy vjeçar i çështjes së targave nga ana e Serbisë për të tensionuar situatën e sigurisë në veri të vendit tonë dhe tash së fundi si përpjekje për të ulur kritikat nga komuniteti ndërkombëtar mbi Serbinë pas parregullsive në sistemin zgjedhor atje.
Pra targat në Kosovë në shtator të vitit 2021 përdoreshin për të kërcënuar Kosovën edhe përmes avionëve Mig 29, të ngritur në qiell përmes kufirit dhe duke tentuar destabilizim në veri të vendit, sidomos nëpërmjet 16 barrikadave të cilat ishin ngritur rrugëve të katër komunave veriore për tri javë rresht në dhjetor të vitit të kaluar. Kurse në muajin në të cilën ndodhemi (dhjetor) po përdoren për të ulur presionin nga perëndimi demokratik, BE-ja, ShBA-ja, mbi Serbinë për zgjedhjet jo të rregullta, jo demokratike e për të mbuluar refuzimin zyrtarë të marrëveshjes bazike të Brukselit që i ka bërë letra kryeministres së Serbisë, Brnabiç, drejtuar këshillit Evropian me 13 dhjetor dhe për të maskuar dështimin e tyre në Banjskë më 24 shtator”, ka thënë Kurti.
j.l./ dita
