Nuk është koha për Tik Tok, po rrezikojnë jetën! Lumenjtë në gradën 5, Federata e Rafting, apel policisë: Ndaloni amatorët

Në rrjete sociale shihen video ku të rinj rrezikojnë veten e tyre dhe turistët duke u futur në Vjosë dhe Osum në këto orë përmbytjesh. Federata e Rafting ka bërë një deklaratë lidhur me këto veprime.

NJOFTIM ZYRTAR

Federata Shqiptare e Rafting

Në ditët e fundit, për shkak të reshjeve të dendura në territorin e Shqipërisë, nivelet e lumenjve kanë arritur maksimumin, ndërsa prurjet dhe shpejtësia e rrjedhave i afrohen gradës 5, kategori që konsiderohet jashtëzakonisht e rrezikshme edhe për sportistët profesionistë.

Federata Shqiptare e Rafting ka ndjekur me shqetësim disa video që qarkullojnë në rrjetet sociale, ku persona amatorë dhe pa trajnim të certifikuar ndërmarrin aktivitete rafting në kushte ekstreme,
duke rrezikuar rëndë jetën e tyre dhe të të tjerëve.

QËNDRIMI I FEDERATËS SHQIPTARE TË RAFTING:

Ne distancohemi plotësisht dhe i dënojmë ashpër këto raste të papërgjegjshmërie. Rafting në kushte të tilla mund të kryhet vetëm nga sportistë të trajnuar, të certifikuar dhe me
instruktorë profesionistë të Federatës Shqiptare të Rafting.

THIRRJE PËR INSTITUCIONET

I bëjmë thirrje Policisë së Shtetit dhe strukturave të emergjencave që:
– të ndalojnë menjëherë këto raste të rrezikshme,
– të sekuestrojnë çdo mjet lundrimi të përdorur në mënyrë të paligjshme,
– të parandalojnë me çdo kusht përsëritjen e këtij fenomeni.

MESAZH PËR QYTETARËT

Ju lutemi, mos u afroni lumenjve në këto kushte ekstreme dhe mos ndiqni shembullin e aventurierëve të papërgjegjshëm që nuk e njohin rrezikun. Jetët njerëzore janë më të rëndësishme se çdo aventurë. Siguria është prioriteti ynë.

Federata Shqiptare e Rafting

n.s. / dita