Drejtori i Përgjithshëm i Policisë së Shtetit, Muhamet Rrumbullaku ka zhvilluar një takim me drejtorin e Përgjithshëm të Doganave, Genti Gazheli dhe me drejtorin e Përgjithshëm të Autoritetit Portual, Pirro Vengu, në kuadër të fluksit të vizitorëve përgjatë sezonit turistik.
Gjatë takimit me Gazhelin dhe Vengu, Rrumbullaku vlerësoi punës intensive që po kryhet nga të gjitha strukturat e Policisë së Shtetit dhe nga ato mbështetëse, për të menaxhuar sa më mirë, pikun e sezonit turistik 2023, si dhe fluksin e vizitorëve dhe turistëve që zgjedhin Shqipërinë.
Takimi, vuri në qendër të diskutimeve ndërmjet titullarëve, luftën kundër trafikimit të lëndëve narkotike, trafikimit të armëve, kundër kontrabandës, kalimit të shumave të konsiderueshme të parave që kanë si burim krimin, si dhe përpunimin e shpejtë dhe të saktë të të dhënave të shtetasve dhe mjeteve me të cilat ata lëvizin dhe shmangien e burokracive, për të lehtësuar maksimalisht lëvizjen dhe për të minimizuar koston kohore.
Gjatë diskutimit, Drejtori i Përgjithshëm vlerësoi bashkëpunimin e deritanishëm ndërmjet 3 institucioneve, dhe theksoi se menaxhimi shumë i mirë i lëvizjes së shumëfishuar gjatë sezonit turistik 2023, pa incidente dhe me rezultate konkrete, dëshmon një angazhim paralel dhe maksimal të të gjithëve, i cili jo vetëm duhet të vazhdojë me këto ritme deri në përfundim të sezonit turistik, por duhet të mbetet njësoj i qëndrueshëm dhe këmbëngulës edhe pas përfundimit të sezonit, duke qenë se pikat e kalimit kufitar përbëjnë një hallkë të rëndësishme të sigurisë publike.
Në vijim, drejtuesit e 2 autoriteteve, Vengu dhe Gazheli, gjithashtu vlerësuan koordinimin e punës me punonjësit e Policisë në pikat e kalimit kufitar dhe rezultatet e arrira nga inteligjenca policore. Bashkëveprimi ndërmjet 3 institucioneve ka përfshirë kontrolle/skanime me metoda bashkëkohore, shkëmbim të informacioneve dhe ndërhyrje të përbashkëta. Të gjitha këto elemente kanë sjellë rezultate të shkëlqyera në luftën kundër krimeve kufitare, si dhe kanë mundësuar qarkullimin e lirë dhe të sigurtë të shtetasve, mallrave dhe shërbimeve.
