Drejtoria Vendore e Policisë Lezhë ka arrestuar një shtetas të mitur për shantazh në rrjetet sociale ndaj bashkëmoshatares së tij.
Drejtoria Vendore e Policisë Lezhë ka njoftuar arrestimin e një shtetasi 17 vjeçar nga Lezha, i cili ka vjedhur një llogari në rrjetin e Snapchat dhe më pas nëpërmjet kësaj llogarie ka shantazhuar një të mitur 16 vjeçare.
“Një e mitur shantazhohej nëpërmjet një llogarie të vjedhur, në rrjetin social Snapchat, se do t’i publikoheshin foto personale, nëse nuk kryente marrëdhënie seksuale me shtetasin që e shantazhonte”, shkruan Drejtoria Vendore e Policisë Lezhë në profilin zyrtar në Facebook.
Kanosja është një vepër penale e cila dënohet me ligj sipas Kodit Penal të Republikës së Shqipërisë.
Ky rast u denoncua gjatë transmetimit të një prej emisioneve investigative, dhe menjëherë pas kësaj shërbimet e Forcës së Posaçme Operacionale të DVP Lezhë kanë vijuar punën për vënien në pranga të autorit.
“Materialet procedurale do t’i kalojnë Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për veprime të mëtejshme”, shkruan Policia e Lezhës./BIRN
b.m/dita
