Nga Artur Qorraj
Botuar në DITA
Formatet tip “Big Brother” tregojnë se jo vetëm në jetën normale apo të zakonshme, por edhe në një shou televiziv live, virtytet dhe parimet nuk kanë shumë rëndësi.
Në fund të fundit qëllimi justifikon mjetin sipas parimit hegelian të tezë-antitezë-sintezës dhe ajo që paska rëndësi është se kush e kap i pari ‘frutin’. Vlera është antivlerë dhe anasjelltas. Pavarësisht se kë lëndon. Në fund do fitojë ai që bën triket më të mira të antimoralit. Jo më kot thuhet se ‘meriton atë që ke’.
Madje edhe të ashtuquajturit VIP-a e njohin ‘lojën e xhunglës’ për pak më shumë para. Në fund të fundit ky është zanati i tyre, misioni i jetës virtuale. Bipolariteti është ‘çelësi’ që në këtë rast hap derën e suksesit.
Kështu ka ndodhur në këtë sezon të “Big Brother VIP”. Një perzonazh me emrin Luis që hyri pa gjë dhe po del me atë që synoi, duke prezantuar si prognozë të të gjithë shfaqjes, atë për të cilën shoqëritë e sotme bëjnë gjithçka: Asgjënë!
E fundit që e pësoi në kurriz duket se ka qenë personazhi Kiara, që kuptoi se u bë vetëm trampolina e Luisit drejt suksesit. Dhe i gjithë mjalti i fillimit, tashmë është kthyer në lotë hidhërimi.
Një publik i tërë i trullosur rri e vështron, dhe dashur pa dashur bëhet kukull e këtij cirku… Kur t’u dalë dehja do kujtohen nëse kanë para mjaftueshëm për ushqimet e muajit, ujin, dritat, faturat gjithandej, borxhet, kreditë, qiratë, garancia e punës, hallet, spitali, e të tjera si këto.
Në fund të fundit shumicës prej nesh i pëlqen më shumë të merret me thashetheme sesa t’i shikojë gjërat ashtu si janë: Thjesht vuajmë nga sindroma e “Skotomës”.
Në fund të ditës Luisit dhe banorëve ua shtrojnë tavolinën e ngrënies dhe ua mbushin sponsorët, sikurse dhuratat që marrin dhe benefitet e tjera.
Thjesht duket se sot iu bashkua ‘tavolinës së realitetit’ edhe Kiara. Jo se nuk ishte. Por realiteti jashtë, iu bë njësh me atë brenda. Dhe derisa të dalë nga shtëpia, duket se do i lërë goxha ‘shenja’ për të ardhmen kjo eksperiencë e hidhur.
Ne nuk na mbetet gjë tjetër veçse ta mirëpresim dhe të shohim se çfarë do të ndodhë. Në fund të fundit të gjithëve u ndodh diçka…
Por më të fituarit dalin ata që i shërbejnë dhe punojnë për “Asgjënë”!
Një sekuencë se çfarë ndodhi:
Edhe pse të gjithë mezi e presim surprizën e bukur që Luizi ka për Kiarën, duket se deri në atë moment moderatorja do jetë duke përjetuar momentet më të këqija brenda shtëpisë.
Si kurrë më parë, me ftohjen e Luizit, Kiara ka ndjerë shumë keq, aq sa ka vënë në pikëpyetje raportin dhe dashurinë e tyre. Por ajo që Kiarën tronditi më shumë, ishte deklarata e Luizit, ku ai u shpreh se marrëdhënia e tyre ka ecur me hapa shumë të shpejtë dhe se nuk është i sigurt nëse do ta vazhdojë këtë lidhje.
Pas kësaj deklarate Kiara tha se ka ngelur pa fjalë e më pas e pyeti nëse tani ajo duhet të vendosë në dyshim dashurinë e tij për të. Luizi heshti për pak çaste e më pas i tha se do jetë koha që do e tregojë më mirë këtë gjë.
Pjesë nga biseda:
Kiara: A duhet të dyshoj të gjitha herët kur më ke thënë të dua më shumë se veten?
Luizi: Koha do e tregojë!
Kiara: Më ke lënë pa fjalë…
Kiara u largua dhe shpërtheu në lot. Gjatë ditës së sotme ajo është parë të qëndrojë e vetme në verandë me lot në sy.
