Martin Nikolli, punonjësi i gardës, i cili u përfshi në një konflikt për motive pronësie të dielën në Hamallaj të Durrësit, në dëshminë e tij të dhënë para uniformave blu, ka deklaruar se nuk ka dashur që të qëlloj mbi anëtarët e familjes Kaçi, por ka qëlluar më shumë për t’i trembur.
Gardisti ka kërkuar falje ndaj kolegëve të tij, duke theksuar ka qene i detyruar ta përdorte armën e shërbimit, pasi familja Kaçi ishte në një numër shumë të madh anëtarësh të cilët po vinin për t’u konfliktuar.
Sipas tij, gjërat u përkeqësuan dhe konflikti u agravua e për këtë shkak thotë se ka qëlluar në ajër për të ndaluar sherrin.
“Erdhi babai i palës tjetër dhe na ofendoi. Konflikti ka nisur në fillim nga ana e tyre. Më pas gjërat u përkeqësuan dhe nisi konflikti më i rëndë. Në fund kam qëlluar me armë në ajër. Qëllimi ka qenë për të ndaluar sherrin dhe konfliktin që kishte nisur. Nxora armën për të qëlluar në momentin që sherri po degradonte deri në përdorim të sendeve dhe objekteve të forta”, mësohet të ketë thënë ish-gardisti Martin Nikolla.
Megjithatë, ai është larguar nga vendi i ngjarjes për t’u kapur nga policia disa orë më pas.
Shkak për ngjarjen dyshohet se u bë një rrugë kalimi, e cila shpeshherë kishte shkaktuar jo pak përplasje mes dy familjeve.
Pas ngjarjes së rëndë, me urdhër të Ministrit të Brendshëm, efektivi i Gardës u përjashtua nga detyra. Martin Nikolli me funksion ndihmës oficer sigurie në grupet e shoqërimit, ishte i punësuar si shoferi zëvendësues i kryeparlamentares Lindita Nikolla.
Kjo e fundit dënoi ngjarjen nëpërmjet një statusi në rrjetet sociale. Nikolla u shpreh se institucionet duhet të dënojnë këdo që ka gisht në këtë rast flagrant pavarësisht pozicionit ku ka shërbyer më herët. Nikolla gjithashtu shkroi se institucionet do t’i ofrojnë familjes Kaçi mbrojtjen që parashikon ligji.
Bashkë me gardistin, policia njoftoi edhe arrestimin e një të afërmi të tij, që po ashtu u përfshi në konflikt. Ai është Afred Nikolla dhe akuzohet për kanosje, plagosje të rëndë me dashje dhe prishje të qetësisë publike.
p.k\dita
