Për shkak të paralajmërimeve që një masë e madhe shkëmbi mund të shembet në ditët në vijim, një fshat i tërë zviceran është urdhëruar të evakuohet. Autoritetet u kanë thënë banorëve të Brienz që të largohen deri të premten.
Kreu i shërbimit të paralajmërimit të hershëm, Stefan Schneider tha se matjet treguan se “deri në 2 milionë metra kub material shkëmbor do të shembet ose rrëshqasë në ditët e ardhshme”.
Ekspertët bëjnë me dije se ngjarje të tilla mund të jenë rezultat i ndryshimeve klimatike.
Raporti vjetor i Organizatës Botërore të Meteorologjisë për Gjendjen e Klimës, zbuloi se Alpet Evropiane patën një vit rekord për shkrirjen e akullnajave, veçanërisht Zvricra, duke humbur 6% të vëllimit të saj të akullnajave midis 2021 dhe 2022.
Rebecca Dell, një studiuese në Universitetin e Kembrixhit paralajmëron se ndryshimi i klimës po shkakton shkrirjen e akullnajave në Alpe.
“Kjo shkrirje mund të destabilizojë shpatet e maleve mbi qytete dhe fshatra. Nëse një pjerrësi bëhet shumë e paqëndrueshme, mund të ndodhin ngjarje të tilla si rrëshqitja e gurëve, “tha ajo për CNN.
Fshati, i cili strehon nën 100 banorë, sipas transmetuesit publik zviceran SRF, ndodhet në kantonin lindor të Zvicrës, Graubünden.
Sipas një deklarate të bashkisë, gjatë shekullit të kaluar, vetë fshati ka lëvizur disa centimetra çdo vit, megjithatë lëvizja është përshpejtuar gjatë 20 viteve të fundit dhe rrëshqitja e dheut tani ka lëvizur rreth një metër në vit.
p.k\dita
