Autori Salman Rushdie doli nga intubimi dhe ishte në gjendje të fliste të shtunën, një ditë pasi u godit me thikë në mënyrë të përsëritur ndërsa përgatitej të jepte një leksion në veri të Nju Jorkut.
Rushdie mbeti i shtruar në spital me lëndime të rënda, por autori tjetër Aatish Taseer shkroi në Twitter në mbrëmje se ai ishte “jashtë ventilatorit dhe fliste e bënte shaka”.
Taseer më vonë e fshiu postimin e tij në Twitter, por agjenti i Rushdie, Andrew Wylie, i tha Associated Press se informacioni i ndarë nga Taseer ishte i saktë, pa ofruar detaje të mëtejshme.
Autori i librit “Vargjet Satanike” u sulmua me thikë, më 12 gusht, gjatë një seminari në skenën e Institutit Shatakua në shtetin e Nju Jorkut.
Agjenti i tij, Andrew Wylie, konfirmoi lajmin për mediat amerikane, por më parë kishte thënë se autori mund të humbasë një sy.
Autori i dyshuar mbi ngjarjen është një 24-vjeçar i identifikuar si Hadi Matar i cili është arrestuar tani më nga policia. Mediat shkruajnë se ai ishte një adhurues gardës revolucionare iraniane.
Kjo ngjarje e rëndë ka bërë jehonë të madhe në mediat iraniane. Disa prej tyre kanë lavdëruar autorin e sulmit teksa gazeta «Kayhan» shkruan se dora e njeriut “që grisi qafën e armikut të Zotit duhet puthur”.
Salman Rushdie u fsheh nën mbrojtjen e policisë britanike në vitin 1988 pasi romani i tij “Vargjet Satanike” u konsiderua nga disa myslimanë si blasfemi. Në atë kohë udhëheqësi më i lartë i Iranit bëri thirrje për vrasjen e shkrimtarit.
a.m/dita
