Shpallen të rinjtë fitues në Universitetet publike dhe private. Lista e fituesve sipas programeve të studimit është publikuar në portalin U-Albania. Arjan Xhelaj, drejtori i Rrjetit Akademik Shqiptar, tregon se tashmë nis faza më e rëndësishme, ajo e regjistrimit në universitete sipas fazave dhe datave të publikuara.
Por këtij procesi do t’i paraprijnë kontestimet, për ata të rinj që nuk janë dakord me rezultatin e shpallur. Më 13 shtator mbyllet raundi i parë i regjistrimeve, ku referuar viteve të kaluara universitetet plotësojnë rreth 80% të kuotave.
Për vendet e lira nis faza e dytë e aplikimit, këtu përfshihen edhe maturantët që do të përfundojnë me sukses provimet e vjeshtës të Maturës Shtetërore, citon A2 CNN.
Sipas të dhënave të deritanishme mbi 2 mijë maturantë ekselentë i kanë fituar të gjitha preferencat e zgjedhura në formularin A2. Pas regjistrimit të tyre në njërën prej degëve të preferuara do të vihen re lëvizjet e listave sipas programeve të studimit, shkruan A2 CNN.
Edhe këtë vit numri i kuotave në universitete është shumë më i lartë se aplikimet. 19.700 kandidatë për 30 mijë kuota në shkollat e larta publike dhe private.
Sërish do të ketë djegie kuotash veçanërisht në universitetet në rrethe dhe degët e mësuesisë. Ndërsa programet IT, Mjekësia, degët e Shëndetësisë i realizojnë kuotat që në dy ditët e para të regjistrimeve.
j.l./ dita
