Shqipëria një nga 3 vendet në Europë që janë më të rrezikuara nga përmbytjet

Rreziku i përmbytjeve është paraqitur në të gjithë botën duke qenë se pritet një dimër më i keq.

Edhe gjatë kësaj vere kishte përmbytje në disa vende ku dhe shumë njerëz humbën jetën.

Cilat vende dhe popullsi janë më të rrezikuara nga përmbytjet në mbarë botën?

Duke përdorur të dhënat nga një studim i fundit i botuar në Nature, kjo hartë grafike paraqet rrezikun e përmbytjeve në të gjithë botën, duke nxjerrë në pah 1.81 miliardë njerëz të ekspozuar drejtpërdrejt.

Holanda dhe Bangladeshi janë dy vendet që kanë më shumë se gjysmën e popullsisë së tyre në rrezik për shkak të përmbytjeve, përkatësisht 59% dhe 58%. Përveç Holandës, vetëm dy vende të tjera europiane janë pjesë e 20 vendeve të para për nga përqindja e popullsisë në rrezik dhe një ndër to është Shqipëria.

Sipas renditjes, 28% e popullsisë (771 mijë njerëz) së vendit tonë janë në rrezik të përmbytjeve duke u renditur e 20-a.

Vendi tjetër është Austria e 18-a me 29%.

Vietnami (46%), Egjipti (41%) dhe Mianmari (40%) përfundojnë pjesën tjetër të pesë vendeve të para.

Vendet aziatike më të rrezikuara nga rritja e nivelit të ujit

Nuk është për t’u habitur që vendet me vija të konsiderueshme bregdetare, sisteme lumore dhe rrafshnalta e gjejnë veten me përqindje të larta të popullsisë së tyre në rrezik.

Vetëm rajoni i Azisë Juglindore përbën më shumë se dy të tretat e popullsisë globale të ekspozuar ndaj rrezikut nga përmbytjet me 1.24 miliardë njerëz.

Kina dhe India përbëjnë përkatësisht 395 milionë dhe 390 milionë njerëz, me të dyja vendet në krye për sa i përket numrit absolut të njerëzve në rrezik të rritjes së nivelit të ujit. Pjesa tjetër e pesë vendeve kryesore për nga popullsia totale në rrezik janë Bangladeshi (94 milionë njerëz në rrezik), Indonezia (76 milionë njerëz në rrezik) dhe Pakistani (72 milionë njerëz në rrezik).

Si po prekin përmbytjet tashmë vende si Pakistani?

Përmbytjet prekën më shumë se 100 milionë njerëz në vitin 2021 në Pakistan.

Me 31% të popullsisë së tij në rrezik nga përmbytjet, Pakistani është veçanërisht i rrezikuar nga përmbytjet.

Në vitin 2010, përmbytjet në Pakistan u vlerësuan të kenë prekur më shumë se 18 milionë njerëz. Përmbytjet e fundit, të cilat filluan në qershor, vlerësohet të kenë prekur më shumë se 33 milionë njerëz pasi më shumë se një e treta e vendit është zhytur nën ujë.

Kostoja e përmbytjeve sot dhe në të ardhmen

Megjithëse numri në rritje i njerëzve është deri tani shqetësimi më i madh që paraqesin përmbytjet, ato sjellin me vete edhe kosto masive ekonomike. Vitin e kaluar, thatësirat, përmbytjet dhe stuhitë shkaktuan humbje ekonomike prej 224.2 miliardë dollarësh në mbarë botën, gati dyfish llogaritur me mesataren vjetore 2001-2020 prej 117.8 miliardë dollarësh.

Një raport i fundit parashikoi se rreziku i ujit (i shkaktuar nga thatësirat, përmbytjet dhe stuhitë) mund të harxhojë 5.6 trilionë dollarë të PBB-së globale deri në vitin 2050, me përmbytjet që parashikohet të përbëjnë 36% të këtyre humbjeve të drejtpërdrejta.

Ndërsa humbjet njerëzore dhe ekonomike të shkaktuara nga përmbytjet vazhdojnë të rriten, vendet në mbarë botën do të duhet të fokusohen në infrastrukturën parandaluese dhe zgjidhjet restauruese për ekosistemet dhe komunitetet tashmë të prekura dhe më të rrezikuara nga përmbytjet.