Si i sabotojnë hetimet OPGJ-të e tipit Malaj, një nga dokumentet që provon se sistemi e njeh mirë kancerin brenda tij

Reagimet ndaj pjesës së parë të investigimit mbi Oficerët e Policisë Gjyqësore, botuar dje nga DITA kanë qenë më të larta se pritshmëria, duke patur parasysh sa pak e njeh publiku këtë hallkë të sistemit të drejtësisë.

Disa prej komentuesve kanë kërkuar të dinë nëse shkeljet në rastin e OPGJ-ve, janë evidentuar më herët nga institucionet përgjegjëse; nëse janë marrë masa dhe nëse është provuar nga vijnë paratë për luksin e pazakontë që shfaq në mënyrën e jetesës kjo hallkë e veçantë e zyrtarëve të shtetit.

Përgjigja është PO. Përpara se të kalojmë në pjesët e tjera të hetimit, po sjellim një nga disa dokumentet zyrtare që provojnë se Dritan Malaj është proceduar për shkelje, por ka vijuar të njëjtën qasje ndaj ligjit dhe detyrës dhe se këta oficerë sabotojnë hetimet në favor të personave që duhen ndëshkuar. Nuk e bëjnë falas.

Vendimi nr 33 i datës 15 korrik 2021 marrë nga Komisioni i Policisë Gjyqësore për Malajn zbulon disa nga mënyrat si vepron kjo kategori e OPGJ-ve.

Ka qenë Prokurori i Pergjithshem, që ka kërkuar me shkresën nr.958/1 date 14.06.2021, proçedimin disiplinor të oficerit Malaj.

Nga shkresa mësohet se Komisioni ka nxjerre Urdherin nr.33, date 25.06.2021 për fillimin e procedimit disiplinor. Dokumenti sugjeron shkelje të shumta në formën e veprimeve dhe mosveprimeve, të cilat kanë sjellë sabotimin e proceseve hetimore.

Nga permbajtja e kerkeses se Prokurorit te Pergjithshëm dhe relacioni shoqërues, rezulton se bazë per procedimin kanë shërbyer veprimet e Malaj, gjate hetimit te dosjes nr. 2109, dosjes nr. 3169, dosjes nr.2381, dosjes nr 261, dosjes nr. 4930, dosjes nr. 7019, dosjes nr.92 etj. Plot 7 dosje brenda një viti të sugjeruara për hetim, dhe pas hetimit janë provuar mosveprime në të shtata (!)

Vendimi thotë se nga aktet që u administruan gjatë seances dègjimore per proçedimin disiplinor, u provua se oficeri Malaj ka kryer “zvarritje të veprimeve hetimore të pajustifikuara dhe në shkelje te dispozitave ligjore te Kodit te Proçedurès Penale”.

Në dosje del se janë sabotuar hetimet për vepra penale si “‘mosbindje ndaj urdhërit te policisë së rendit”, per vepra penale “goditje per shkak te detyres”, për vepra penale “organizim i llotarive te palejuara”, për vepra penale “dhunë në familje”, krime me rrezikshmëri të lartë shoqërore, etj.

“Në funksion te hetimit te proçedimit penal, prokurori i çështjes, ka nxjerre urdhrin per kryerjen e veprimeve hetimore, duke i kerkuar oficerit te Policise Gjyqèsore qè veprimet hetimore te kryhen brenda datës së caktuar dhe ne perfundim të tyre të perpiloj relacionin perfundimtar. U provua se veprimet hetimore nuk jane kryer brenda afatit te caktuar dhe proçedimi penal është mbajtur në dore prej oficerit te Policise Giyqësore Dritan Malaj per 6 muaj. Nuk ështe perpiluar relacioni perfundimtar, sikurse kërkon neni 327 i Kodit te Procedures Penale” – thotë vendimi për Malajn.

Njëjtë ka vepruar oficeri në fjalë edhe në procedimin penal nr. 3169.

“Pas regjistrimit te proçedimit penal, prokurori ka nxjerre urdherin per kryerjen e veprimeve hetimore, duke urdhëruar oficerin Malaj te kryej keto veprime hetimore. Nga studimi i akteve te procedimit penal ka rezultuar se oficeri Malaj ka zvarritur ne menyre te pajustifikuar hetimet tej çdo afati te arsyeshëm dhe nuk ka perpiluar relacionin perfundimtar” – shkruhet në vendimin e Komisionit për këtë dosje tjetër.

Malaj ka vijuar me të njëjtin stil edhe për organizimin e llotarive te palejuara, një treg që qarkullon miliona.

“Nga studimi i akteve te proçedimit penal ka rezultuar se oficeri i Policise Gjyqësore Dritan Malaj, në kundershtim me parashikimet e nenit 323 te Kodit te Procedures Penale, ka zvarritur tej çdo afati ligjor dhe ne menyre te pajustifikuar kryerjen e veprimeve hetimore. Konstatohet se proçedimi penal eshte mbajtur ne dore nga oficeri Malaj për një vit” – thotë vendimi.

Për vepra të tjera penale që renditen në vendim, hetimet janë mbajtur gjithashtu peng për afate të gjata, shumë më tepër se tre muaj që parashikon ligji. Pse u duhet kjo “kohë shtesë” OPGJ-ve dhe kundrejt cilit çmim hetimet sabotohen me lojën e njohur të afateve?

Shkresa nxjerr në dukje se korruptimi në disa vepra penale passjell krime të rënda.

“Duke patur parasysh natyrën dhe rrezikshmerine që paraqet kjo veper penale dhe kohen që duhen për kryerjen e veprimeve hetimore, eshte e pajustifikuar zvarritja e hetimeve tej afatit tre mujor te parashikuar nga neni 323 i Kodit te Proçedurès Penale. Nuk ka patur asnjë arse apo shkak ligjor qe dosja te mbahej prej oficerit te Policise Gjyqësore Dritan Malaj mbi pese muaj dhe për periudhën më të madhe pa u kryer asnje veprim hetimor” –  lexohet në vendim për një tjetër dosje që duhej hetuar në terren nga oficeri në fjalë.

Nga terèsia e materialeve te administruara, Komisioni e ka gjetur fajtor oficerin Malaj për të gjitha rastet e referuara nga Prokurori i Përgjithshëm, duke i konsideruar “te provuara” shkeljet e ligjit të kryera prej tij.

Gjithsesi kjo është vetëm një nga shkresat që tregon jo vetëm ku fle lepuri i hetimeve të sabotuara, por edhe se kjo kategori e OPGJ-ve njihet mirë edhe nga vetë sistemi…

Materiali i plotë mund të lexohet  në Dita print. Vijon