Për 70% të qytetarëve evropianë është me rëndësi që BE të ofrojë mbështetje për Ukrainën, por vetëm gjysma e tyre e konsiderojnë atë një prioritet.
Kështu thotë sondazhi i radhës i IPSOS dhe Euronews mbi argumentin në fjalë.
Që nga fillimi i luftës, BE dhe vendet anëtare kanë garantuar 93 miliardë euro në ndihma financiare, ushtarake dhe humanitare për Ukrainën, e cila po vuan nga agresioni rus. Kësaj i shtohen 50 miliardët që liderët e Unionit vendosën në fillim të shkurtit.
Sipas Sven Biscop, drejtor i institutit “Egmont” në Bruksel, BE nuk ka zgjidhje tjetër veçse të mbështesë betejën e Ukrainës për territorin e saj. Në të njëjtën kohë, rënia eventuale e Ukrainës nuk do të thotë mposhtje të BE-së, por do të inkurajonte Rusinë të avancojë pushtimin. Parandalimi i këtij skenari është interes bazë për Unionin.
“BE ka bërë një hap të paprecedent. Ne kemi bërë një vend në luftë kandidat për anëtarësim. Nuk e kemi bërë kurrë këtë, që do të thotë se kemi marrë përsipër përgjegjësinë për mbijetesën e pavarësisë së Ukrainës në një territor sa më të gjerë. Ndaj, me këtë vendim të rëndësishëm gjeopolitik, nuk kemi zgjidhje tjetër veçse të ndihmojmë Ukrainën”, tha Sven Biscop, drejtor i institutit “Egmont”, Bruksel.
Të dhënat e sondazhit tregojnë se vendet skandinave janë pro mbështetjes së Ukrainës krahasuar me mesataren e BE-së. Përpjesëtimi më i madh është ai i suedezëve, 68%.
Në ekstremin tjetër është Hungaria, me vetëm 12 për qind të qytetarëve që mendojnë se çështja duhet të jetë prioritet. Është një korrelacion interesant që votuesit e së djathtës ekstreme të Identitet dhe Demokraci janë më pak të prirurit për të mbështetur Kievin.
Sipas ekspertëve, kjo tregon influencën e keqinformimit rus.
“Më duket e habitshme që shumë parti ekstremiste të djathta, që hiqen si nacionaliste, i lejojnë vetes të manipulohen nga Rusia dhe të keqinformojnë votuesit. Nëse do të ishin të sinqerta, që të kujdeseshin për interesin kombëtar, atëherë do ta kuptonin se është në interesin e tyre të mbështesin Ukrainën përballë fushatës ruse të keqinformimit”, tha Sven Biscop, drejtor i institutit “Egmont”, Bruksel.
Sven Biscop shton se Ukraina i habiti të gjithë me forcën dhe vullnetin e saj luftarak dhe kjo vendosmëri forcoi synimin e BE-së dhe Shteteve të Bashkuara për ta mbështetur atë. Dhe tani është bërë e qartë se pa një mbështetje të mëtejshme ushtarako-financiare, vendi nuk mund të mbrojë pavarësinë e tij.
n.s. / dita
Vitin e Pare Ukraina habiti gjithe Boten,,Vitin e dyte vodhi gjithe Boten,Vitin e trete bota i tregoi Edi Ramen.-Vetem ky Magjistari te shpeton nga Rusia !