Sot në Mal të Zi mbahen zgjedhjet presidenciale ku konkurrojnë 7 kandidatë.
Këto janë zgjedhjet e para presidenciale që nga përmbysja e Partisë Demokratike të Socialistëve të presidentit aktual Milo Gjukanoviç që ishte në pushtet më shumë se tre dekada, kur në gusht të vitit 2020, Fronti Demokratik pro-serb dhe pro-rus, Demokratët dhe lëvizja URA fituan shumicën në parlament.
Në këto zgjedhje të drejtë vote kanë 542.154 qytetarë. Kandidatët janë kreu aktual i shtetit dhe i Partisë Demokratike të Socialistëve (DPS) Milo Gjukanoviç, një nga liderët e Frontit Demokratik (DF) Andrija Mandiç, nënkryetari i Lëvizjes Evropa Tani (PES) Jakov Milatoviç, kryetar i demokratëve Aleksa Beçiç, deputet i Partisë Socialdemokrate (SDP), Draginja Vuksanoviç Stankoviç, kreu i Malit të Zi të Bashkuar Goran Daniloviç dhe influenceri Jovan Radulović Jodžir.
Presidenti aktual, Milo Gjukanoviç kërkon sërish rikonfirmimin në këtë detyrë. Ai është shprehur se në krye të vendit duhen njerëz seriozë dhe të përgjegjshëm.
Qendrat e votimit do të jenë të hapura nga ora 07:00 deri në 20:00.
Këto janë zgjedhjet e katërta presidenciale që nga rivendosja e pavarësisë.
Presidenti i Malit të Zi do të zgjidhet kandidati që merr më shumë se gjysmën e votave të vlefshme të votuesve që kanë votuar.
Nëse asnjë kandidat nuk merr numrin e duhur të votave, raundi i dytë i zgjedhjeve do të mbahet brenda 14 ditësh, pra më 2 prill.
Në raundin e dytë marrin pjesë dy kandidatët që kanë fituar numrin më të madh të votave. Presidenti i vendit zgjidhet për pesë vjet.
j.l./ dita
