SPAK nuk është as Inteligjencë Artificiale e as UFO

Nga Artan Xh. Duka

Paraqitja në SPAK e kryebashkiakut Veliaj lidhur me hetimet rreth djegësit të Tiranës është si dhënie shëmbulli e korrektësisë e respektit ndaj institucioneve ashtu edhe shënjë e autoritetit të SPAK ndaj kujtdo, sado lart në piramidën politike apo shtetërore në vend. Askush nuk mund të shpërfillë ose është mbi drejtësinë dhe në mos të dyshuar apo dëshmitar, të gjithë që mund të hedhin dritë mbi dosjet e abuzimit, duke nisur nga Rama, Berisha etj nga Gërdeci, 21 janari, rasti Ahmetaj, konçesionet etj bëma të qeverisjeve të kohës, duhet të trokasin në SPAK!

Autoriteti i SPAK është provë e suksesit të reformës në drejtësi dhe politika e sotme, nëse e ka seriozisht kur e përshëndet këtë reformë, deri mburret si Rama për autorësi, të bëjë edhe lëvizjen e fundit në funksion të drejtësisë dhe respektit ndaj qytetarit shqiptar, vetingun e politikës! Fundja, nuk kanë c’të fshehin!

Nuk ka llampë të Aladinit

Edhe Ethan Hunt (filmi “Mision i pamundur”) të kishte në krye SPAK, nuk do të mund të llagaronte me urdhër peshku tre dekada zullum abuzimi politik. E keqja hyri thellë, u bë huq e normalitet dhe sa për perëndimin, zgjodhi gjeopolitikën ndaj demokracisë e bëri sehir gjatë! Vetë drejtësia e plepave, si pjellë e politikës që është, u katandis levë e saj ndaj dhe SPAK sot jo vetëm që ka një “det” të tërë të politikës për të kaluar më këmbë por i duhet të merret edhe me “litarët” e mbetur tek drejtësia.

SPAK nuk është as Inteligjencë Artificiale e as UFO që nuk ndikohet nga mjedisi politik historikisht mbytës për pavarësinë e drejtësisë. Njerëz janë dhe ata dhe përballë kanë “legjenda” të tranzicionit në PS e PD që kanë ende në dorë (sajesat hetimore në Kuvënd, kulisat e e amnistisë, ligjet etj), që kanë ngjizur aq fanatizëm e militantizëm partiak që pastaj të keqpërdoret rëndom sa herë u troket drejtësia në derë nga “Rrugica që kërkon diell” tek molotovët ndaj Bashkisë, zjarri bubulak në Kuvënd etj.

SPAK nuk e ka të lehtë kur një hetim normal penal shihet e trumbetohet nga politika e media pranë, si hakmarrje e padëgjuar(!) politike tek publiku. SPAK nuk e ka të lehtë tani që paniku është sheshit dhe vetë takëmi i zullumit elitar është më i paparashikueshëm se kurrë dhe tani që nuk ka më ç’të humbasë (nga ajo që nuk i përket), dy duar për një kokë!

Gjithsesi, falë Amerikës e BE, sot drejtësia po lëshon “hije” dhe paniku tek politika e trëmbur flet vetë. Abuzuesit e kanë humbur toruan dhe SPAK po ngjiz besim tek drejtësia sepse e paimagjinueshmja deri dje, po ndodh!

Harruan se ka të nesërme!

“Ajsbergu” i zullumit është vërtet intimidues për SPAK e qytetarin por ndërkohë edhe zullumi ka rradhë. Qytetari e di që peshku qelbet nga koka ndaj dhe ai ka ato pritshmëri që ka dhe SPAK duhet t’i përmbushë ato duke bërë që “barinjtë” e djeshëm e të sotëm pa përjashtim e kushdo tjetër pas tyre që ka patur e ka pushtet gjatë bëmave të abuzimit, të trokasë tek SPAK për të hedhur dritë mbi gjithshka, qoftë si dëshmitar apo përgjegjës për to.

E keqja nuk vjen nga hiçi e zhduket në hiç e ata në majat e qeverisjeve, PS, PD e LSI bashkë, mbajnë përgjegjësi e kanë detyrime kur gjërat nuk shkojnë mbarë. Jo vetëm kur përfliten se janë vetë pas të keqes apo e dinin dhe nuk vepruan ndaj saj por edhe kur bëjnë të befasuarin duke pranuar se u kaluan ujë nën rrogoz! Syleshëria nuk është justifikim por përgjegjësi më vete sepse pushteti duhet të ketë protokolle e praktika të atilla që kontrollojnë punën dhe korrektësinë me detyrën të kujtdo atje që hedh firma për lekun e pasurinë e popullit dhe nëse ish-ministrat trokasin sot si të hetuar në SPAK, duhet që edhe ish-shefi i tyre të trokasë atje minimalisht si dëshmitar.

Supngritja nuk mjafton për të larë duart kur bëhet fjala për mirëbesimin në kullandrisjen e parasë e pasurisë qytetare. Sidomos në një realitet tredekadash ku të gjithë ia dinë të gjithëve gjithshka dhe zullumit i doli ndroja e frika e bëhet pa teklif. I pushtetshëm i djeshëm apo i sotëm, majë dritares, karrikes apo hekurave, çirak që hedh firmat si bedel etj, kushdo gjatë “turnit” të të cilit përkon me abuzimin që heton SPAK, duhet të trokasë atje. Më së paku si dëshmitar. Qoftë dhe të pastrojë emrin e tij.

Nuk të bën për burrë!

Për shkak të zullumit masiv në tranzicion, sot SPAK përballet rëndom me reagim “ma ngrohe, ma ftohe” prej politikës së vjetër në panik. Lëvdohet apo përmëndet si gogol kur hap dosje ndaj tjetrit por përflitet e anatemohet kur troket në derë duke ngjallur irritim e paranojë jo vetëm si-qysh-tek ndodhi që erdhi kjo ditë por dhe se po i bëjnë shëmbull ndërkohë që lënë rehat të tjerë! Rrethana këto që mbase krijojnë një valë intimidimi por dhe që mund të shpien ujë në mullirin e SPAK sepse mbase korbi korbit nuk ia nxjerr sytë por kur zihen si qëntë në kasaphanë, i nxjerrin të palarat shoqi-shoqit në mejdan.

SPAK nuk mund të shmangë këtë zallamahi lajmesh e përshtypjesh por ka aq në dorë të ruajë ca barazpesha që bëjnë për vete e rritin besimin tek shumica e popullsisë. E nisi nga “koka” me Berishën në kampin opozitar por qytetari e di që abuzimi nuk ka ngjyrë dhe SPAK nuk e ka luksin të shihet si i paanshëm në këtë mes. Të gjithë atje “lart”, Rama i pari, duhet të thirren në SPAK, në mos si të dyshuar, si dëshmitarë për abuzimin që ndodhi në kohën kur ishin “barinjtë” e qeverisë (rasti Ahmetaj etj) dhe kjo fashit si përfoljen e SPAK ashtu edhe akuzat e hedhura ndaj politikanëve në hava.

SPAK e di që përparësitë e hetimit duhet të jenë kokat dhe çështjet e mëdha dhe ndonse rendja pas “peshkut” të vogël në dukje mund të mos jetë aq lajm që të ngjalli besim e shpresë në publik, mbase është edhe qasja e duhur që një SPAK dinak të zërë “peshkun” e madh. Koha do të tregojë por durimi qytetar ka kaluar cakun dhe që të mos mendohet se bota po mbron “gangsterët” e saj, shpresa e vetme mbetet që SPAK di çfarë bën. Fakti që sot zullumi po i jep shumë gojës e po e bën si qeni tek dera e xhamisë, flet vetë. E kupton që nuk është film dhe se një “dinak” si SPAK nuk të bën për burrë e trim!