Spanja është finalistja e parë e Kupës së Botës 2026. Ajo mundi mbrëmë Francën në një duel yjesh të futbollit botëror. Kjo gjysmëfinale ishte konsideruar me të drejtë edhe si finalja e madhe nisur nga përbërja e lojtarëve cilësorë që kanë të dy ekipet. Mbrëmë spanjollët treguan potencial të madh në mesfushë dhe e izoluan Francën, duke ia pamundësuar asaj të dalë në lojën e vet më të mirë. 15 minutat e para të ndeshjes ishin të barabarta, ku të dyja skuadrat analizonin lojën e njëra-tjetrës.
Por një episod do të ndryshonte rrjedhën e ndeshjes. Gjyqtari akordon penallti për Spanjën në minutën e 22-të. Golin e epërsisë 1:0 për spanjollët e shënoi Mikel Ojarzabal. Ai ishte i saktë nga pika e bardhë në minutën e 22-të. Portieri i Francës, Mike Maignan kuptoi anën, por nuk arriti ta presë gjuajtjen e Ojarzabalit. Ishte goli i pestë i sulmuesit spanjoll në Kupën e Botës 2026.
Pjesa e parë e takimit u mbyll 1-0 për spanjollët. Në pjesën e dytë pritej që Franca të përmirësote lojën e saj dhe ajo e bëri këtë, por nuk arriti të imponohet përballë një kundërshtari që luajti një “tiki-taka” të sofistikuar taktike, duke bllokuar hapësirat dhe duke ushtruar një kundërpresion që e mbajti Francën të izoluar në fushë, me reparte të shkëputura dhe me sulmues që u markuan mjaft mirë.
Atë që nuk e bëri Franca në fushë e bëri Spanja për herë të dytë. Pedro Porro shënoi golin e dytë pas një kombinimi perfekt të lojtarëve spanjollë në fazën ofensive. Ballëpërballë me portierin francez ai arrin ta mposhtë dhe të dërgojë topin në rrjetë, duke dyfishuar rezultatin.
Trajneri Deshamps bën ndryshime të shumta te Franca, duke fuqizuar sulmin, por Spanja me moral të lartë di ta përballojë presionin. Madje Lamine Jamal tregohet i rrezikshëm në çdo prekje topi. Nga ana tjetër, edhe trajneri De la Fuente bën ndryshime në ekip, duke nxjerrë lojtarët e lodhur dhe duke futur elementë të rinj si Uilliams e të tjerë që bënë mirë detyrat e tyre në fushë.
Pavarësisht se Franca pati gati 40 minuta kohë për të bërë kthesë pas pësimit të golit të dytë, nuk ia doli. Goditjet e Mbape përfunduan të gjitha mbi traun e portës spanjolle. Për pasojë, Spanja e fitoi këtë ndeshje 2-0 dhe siguroi finalen e madhe. Franca u eliminua dhe pret pa shumë motivim kundërshtarin për vendin e tretë në Botëror. Pritet të mësohet finalisti i dytë mes Argjentinës dhe Anglisë, një ndeshje që pritet të prodhojë emocione të tjera të mëdha nga kjo Kupë Bote.
