Largimet e Sergio Busquets dhe Jordi Albas kanë një efekt anësor pozitiv për Barçën. Të dy veteranët kishin paga shumë të larta, të trashëguara nga epoka e Bartomeut. Mu uljen e ndjeshme të nivelit të pagave, tani mund të regjistrohet lehtësisht edhe Gavi.
Andaluziani ka një klauzolë në kontratën e tij sipas së cilës mund ta ndërpresë nëse klubi katalanas nuk do të jetë në gjendje ta regjistrojë me ekipin e parë para 1 korrikut.
Busquets dhe Alba e lehtësojnë me rreth 40 milionë euro arkën e Barcelonës. Tani ndizet drita jeshile edhe për përditësimin e kontratës së Araujos dhe rinovimin e kontratës së të riut Alejandro Balde. Gjithçka. Tifozët e Barçës, në fakt, po presin me ankth surprizën e madhe: rikthimin e Lionel Messit.
Gjithashtu Barça njoftoi këtë të enjte arritjen e një marrëveshjeje sponsorizuese me TP Vision, kompaninë përgjegjëse për projektimin dhe prodhimin e produkteve Philips.
Nga kjo e enjte, në ndeshjen kundër Mallorcas, marka “Amblight TV” do të vendoset në mëngët e fanellës së “blaugranave”.
Klubi nuk i zyrtarizoi shifrat apo kohëzgjatjen e kontratës, por, siç theksohet nga “El Mundo Deportivo”, klubi katalan do të përfitojë 30 milionë euro në tre vjet në një kontratë në rritje (tetë milionë në sezonin 2023-24, 10 milionë në 2024-2025 dhe 12 në 2025-2026).
Ekziston mundësia që kontrata të zgjatet pas vitit të tretë, por ngaqë është një vit zgjedhor, Barça do ta lërë të hapur mundësinë për ta ndërprerë në vitin 2026.
Kështu, Barça merr një tjetër injeksion të rëndësishëm ekonomik, që do të ndihmojë në paraqitjen e planit të qëndrueshmërisë në LaLiga, në mënyrë që të jetë në gjendje të kryejë afrimet e reja, ashtu siç dëshiron Xavi Hernandez.
