Nga Orgen Peci
Gjykata Europiane për të Drejtat e Njeriut (GJEDNJ) ka publikuar vendimin për çështjen Selimi kundër Shqipërisë, duke i dhënë të drejtë ish-anëtarit të Gjykatës së Lartë, Shkëlzen Selimi, i cili u shkarkua nga Komisioni i Pavarur i Kualifikimit në kuadër të procesit të vettingut.
Sipas vendimit të Strasburgut, procedura ndaj Selimit ka qenë e parregullt, në shkelje të standardeve të një procesi të drejtë. GJEDNJ konstaton se Selimi nuk ka pasur garanci të mjaftueshme procedurale, çka e bën të jashtëligjshëm vendimin që çoi në largimin e tij nga detyra.
Bazuar në analizën e vendimit, procesi i vlerësimit të pasurisë dhe integritetit nuk ka respektuar standardet minimale të transparencës dhe paanësisë.
Veç kësaj, organet e vettingut – thotë vendimi – nuk kanë garantuar një proces të balancuar dhe të drejtë, ndërsa argumentet e mbrojtjes së Selimit nuk janë marrë në konsideratë siç kërkon parimi i barazisë.
Shkelja sjell detyrimin e shtetit shqiptar të rishqyrtojë situatën. Vendimi hap praktikisht rrugën që Selimi të ketë të drejtën për t’u rikthyer në detyrë, përveç kompensimit financiar që pritet të përcaktohet në zbatim të vendimit.
Ky është një nga vendimet më të forta të Strasburgut ndaj procesit të vettingut. Ai cenon legjitimitetin e një prej procedurave më të rëndësishme të reformës në drejtësi.
Për herë të parë, një anëtar i Gjykatës së Lartë fiton në Strasburg dhe Gjykata i njeh shkelje kaq të rënda në procesin e shkarkimit të tij. Ky rast pritet të krijojë precedent për çështje të tjera të gjyqtarëve të shkarkuar.
Çfarë ndodh tani?
Vendimi i GJEDNJ nuk përbën automatikisht kthim në detyrë, por Shqipëria detyrohet të marrë masa për të korrigjuar shkeljet, ndërsa Këshilli i Lartë Gjyqësor dhe organet e tjera duhet të shqyrtojnë mënyrën e rikthimit ose kompensimit. Mund të hapet një valë e re kërkesash në Strasburg nga gjyqtarë të tjerë të shkarkuar.
Ky vendim konsiderohet nga juristët si test serioz mbi besueshmërinë e vettingut dhe për mënyrën se si është zbatuar në raste të veçanta Reforma në Drejtësi.
—-
©️Copyright Gazeta DITA
Ky artikull është ekskluziv i Gazetës DITA, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar DITA dhe në fund të vendoset linku i burimit, sipas Nenit 178 të Ligjit Nr/ 35/2016
Silva Konti e Saliut e ka bere vetingun! A e dini qe kane kaluar ate, vettingun, juristet e Plepave te Saliut 6 mujore! Si ka mundesi ky SPAK. Kjo Gjykate ka njerez te ketij lloji! Pra keta jane pjese e sektit kriminal te Saliut! Drejtesine e bejne Kriminelet!