Ditën e sotme do të mbahet takimi i radhës në Bruksel ndërmjet kryenegociatorit të Kosovës, Besnik Bislimi dhe atij serb, Petar Petkoviç për çështjen e dinarit serb.
Ky takim vjen pasi dy muaj më parë ka hyrë në fuqi rregullorja e re e Bankës Qendrore të Kosovës (BQK) për transaksionet me para të gatshme, ku thuhet se e vetmja valutë zyrtare është euro, duke përjashtuar kështu dinarin nga qarkullimi.
Në lidhje me këtë takim që pritet të mbahet sot ka shkruar ditë më parë i dërguari i Bashkimi Evropian për dialogun, Miroslav Lajçak.
“Të dy palët do të kthehen në Bruksel këtë javë dhe shpresoj se do të jemi në gjendje të kapërcejmë dallimet të enjten”, shkruan ai.
Pas takimit të fundit, më 25 mars në Bruksel, kryenegociatori i Kosovës, Bislimi ka shprehur nevojën për një takim shtesë për zgjidhjen e çështjes së dinarit serb. Ai nuk ka dhënë detaje të hollësishme rreth propozimeve të diskutuara në Bruksel, të ndërmjetësuara nga i dërguari i BE-së për dialogun Kosovë-Serbi, duke shpjeguar se zbulimi i detajeve mund të kishte një ndikim negativ në procesin.
j.l./ dita
