“Temperatura mesatare më e lartë se kurrë”, OKB ngre alarmin: Tetë vitet e fundit ishin më të ngrohtat

Tetë vitet e fundit ishin më të ngrohtat e regjistruara në nivel global, sipas gjashtë grupeve kryesore të të dhënave ndërkombëtare të temperaturës.

Shkencëtarët e OKB -së kanë thënë se të dhënat “e zymta” të vitit 2022 tregojnë se viti i kaluar ishte një tjetër vit “afër rekordit”, që u rendit si i gjashti më i ngrohtë në të dhënat që datojnë që nga viti 1850.

Ata kanë paralajmëruar se pavarësisht temperaturave ekstreme që pamë në vitin 2022, viti mund të jetë “një nga vitet më të freskëta të pjesës tjetër të jetës sonë”, pasi ngrohja globale ushqehet nga përqendrimet gjithnjë në rritje të gazit serrë dhe nxehtësia e akumuluar.

Temperatura mesatare globale vitin e kaluar ishte rreth 1.15 C mbi nivelet para-industriale (1850-1900), duke shënuar vitin e tetë radhazi që temperaturat vjetore globale kanë arritur të paktën 1C mbi nivelet para-industriale.