Marrëdhëniet mes Argjentinës dhe Brazilit kanë hyrë në një fazë të re tensioni, pasi qeveria braziliane kërkoi tërheqjen e ambasadorit argjentinas nga Brasilia dhe uli nivelin e përfaqësimit diplomatik në atë të të ngarkuarit me punë.
Sipas raportimeve nga mediat e huaja, vendimi i Brazilit erdhi pas deklaratave të presidentit argjentinas Javier Milei, i cili e cilësoi sërish homologun e tij brazilian, Luiz Inacio Lula da Silva, si hajdut dhe të korruptuar, duke nxitur reagimin e ashpër të Brasilias.
Në një deklaratë, qeveria argjentinase tha se e konsideron vendimin e Brazilit të njëanshëm dhe shprehu keqardhje që vendi fqinj po izolohet për arsye ideologjike. Megjithatë, ministri i Jashtëm argjentinas, Pablo Kirno, theksoi se Buenos Aires nuk ka ndërmend të ndërpresë marrëdhëniet diplomatike me Brazilin.
Pavarësisht kësaj, ulja e nivelit të përfaqësimit diplomatik konsiderohet një përshkallëzim i paprecedentë në marrëdhëniet mes dy vendeve më të mëdha të Amerikës Latine, ndërsa tensionet mes dy liderëve vijojnë të thellohen edhe në prag të proceseve zgjedhore në të dyja shtetet.
j.l./ dita
