Seanca plenare e të enjtes nisi me debate dhe tensione, pasi nënkryetari i PD, Luciano Boci ka akuzuar mazhorancën për ‘eleminimin’ e opozitës pas vendimit për përjashtimin e 5 deputetëve mbështetës të grupit të Sali Berishës.
Pasi kryeparlamentarja Lindita Nikolla i ndërpreu fjalën Bocit, deputetët e PD, të grupit të Berishës u ngritën dhe rrethuan foltoren, teksa u afrua dhe Garda.
“Ky kryeministër autor i krimit duhet të jetë këtu. Nga këtu ky kryeministër duhet të dalë me pranga në duar”, tha Boci.
Ajo iu drejtua edhe deputetit Bardhi ku i kërkoi të tregojë kujdes me etikën dhe sjelljen.
“Kujdes etikën! Të kujtoj etikën dhe qytetarinë. Ju bllokuat foltoren. Duke shkelur rëndë rregulloren e Kuvendit”, shtoi ajo.
Deputeti Gazment Bardhi i kërkoi Kuvendit të anulojë ligjet e miratuara në seancë e shkuar, pasi sipas tij, këto ligje kaluan duke i mohuar zërin 54 deputetëve të opozitës dhe kjo për të është e padrejtë.
Interpelanca zhvillohet sot për çështjen “McGonigal” dhe akuzat për lidhjet e tij me kryeministrin Rama.
Konferenca e Kryetarëve më 30 janar futi në kalendarin e punimeve të Kuvendit kërkesën për interpelancë urgjente të kërkuar nga grupimi demokrat i Enkelejd Alibeajt.
Deputeti i PD Alibeaj, do të ‘përballet’ me Kryeministrin Edi Rama, megjithëse ky i fundit ende nuk dihet nëse do të marrë pjesë në seancën e sotme.
Kujtojmë që pas seancës së kaluar, Sekretariari për Procedurat, Votimet dhe Etikën vendosi përjashtimin me 10 ditë nga komisionet dhe seanca plenare e Kuvendit Sali Berishën dhe katër deputetë të tjerë të PD.
j.l./ dita
