Komisioni Qendror i Zgjedhjeve në Kosovë thotë se është vonë tërheqja e Partisë Serbe nga zgjedhjet lokale në 4 komunat në veri.
Sipas zëdhënësit të KQZ, Valmir Elezi, ky subjekt duhej ta kishte marrë me kohë këtë vendim dhe deri më tani zyrtarisht nuk kanë pranuar asnjë njoftim nga asnjë subjekt për tërheqje.
Zëdhënësi i KQZ-së, Valmir Elezi, deklaroi për KosovaPress se periudha për tërheqje nga gara zgjedhore është mbyllur me kohë.
Sipas Elezit, sot janë shtypur edhe fletëvotimet dhe emri i Jabllanoviçit si kandidat për kryetar të Leposaviqit dhe kandidatëve për këshilltarë komunalë nga Partia e Serbëve të Kosovës, do të jenë mes alternativave për votuesit së dielës.
“Komisioni Qendror i Zgjedhjeve ka përmbyllur procesin e certifikimit të subjekteve politike dhe kandidatëve për pjesëmarrje në zgjedhjet e së dielës, më 23 prill. Po ashtu, më 27 mars 2023 ka përfunduar edhe afati për tërheqjen e subjekteve politike nga gara zgjedhore.
Pasi janë përmbyllur të gjitha aspektet që kanë të bëjnë me subjektet politike dhe kandidatët pjesëmarrës në zgjedhje, KQZ-ja ka miratuar dizajnin dhe përmbajtjen e fletëvotimeve. Së fundmi, procesi i shtypjes së tyre ka përfunduar gjatë ditës së sotme, e enjte”, deklaroi Elezi.
m.b/dita
