Për të ndjekur studimet e larta në degën e Mjekësisë së Përgjithshme në Universitetin e Mjekësisë së Tiranës, duke nisur nga viti i ardhshëm akademik, maturantët do të duhet që krahas formulës aktuale, t’i nënshtrohen edhe një testi pranimi. Provimi do të zhvillohet mbi njohuritë e fituara nga maturantët gjatë viteve të shkollës së mesme në tre lëndët që përafrohen më shumë me këtë degë. Konkretisht bëhet e ditur se pyetjet e testit të informatizuar që do të zhvillohet në Qendrën e Shërbimeve të Arsimit, do të jenë rreth njohurive të fituara në lëndën e Biologjisë, Kimisë, dhe Fizikës.
Puna për hartimin e fondit të pyetjeve për këtë test pranimi tashmë ka nisur, dhe sipas marrëveshjes që Ministria e Arsimit dhe Sportit ka bërë me Universitetin e Mjekësisë, deri në datën 31 dhjetor ky fond pyetjesh do të jetë publik, i cili do të jetë në dispozicion të të gjithë maturantëve që do të duan të garojnë për vijimin e studimeve të larta në degën e Mjekësisë së Përgjithshme për kuotat e reja të pranimeve që do të realizohen përgjatë vitit 2023.
Në total do të jenë 3000 pyetje nga lëndët: Biologji, Kimi dhe Fizikë. Autoritetet e arsimit kanë bërë me dije se për përgatitjen e fondit janë përzgjedhur mësuesit më të mirë të këtyre lëndëve. Sipas tyre, maturantët do të kenë kohën e mjaftueshme për këtë provim shtesë, i cili fillimisht do të pilotohet në këtë degë, për t’u shtrirë më pas në vitet e ardhshme edhe në degët e tjera të profileve mjekësore. “Pyetjet do të jenë të lidhur me lëndët, biologji, kimi dhe fizikë, të cilat përafrohen më shumë me degën e Mjekësisë. Kështu maturantët do të kenë mundësi që t’i shohin, të konsultohen dhe t’u referohen në mënyrë që mund të përgatitjen sa më mirë për këtë provim. Kjo bëhet me qëllim që në këtë degë të shkojnë kandidatët që kanë vërtete rezultatet më të larta”, konfirmojnë autoritetet e MAS.
Provimi i pranimit do të jetë i ndarë në tri nivele, ashtu sikurse edhe testi i maturës është, apo sikundër janë edhe testet që zhvillohen në shkollë. Sipas skemës së përcaktuar është menduar teza e provimit online do të ketë në përmbajtje rreth 50 pyetje të cilat do të vlerësohen me një sistem prej me 100 pikësh, duke përfshirë pyetjet për të tria nivelet e vështirësive. Në përfundim të zhvillimit të testimit çdo maturant do të mund të mësojë edhe pikët e marra me të gjitha përgjigjet e dhëna. Përgjigjen ju e merrni përmes një deklarate në kohë reale, sapo e përfundoni provimin dhe që sapo përfundoni provimin ju kuptoni se në cilin pozicion të rankimit jeni.
Ndikimi i provimit dhe rezultateve të shkollës së mesme
Sikundër edhe u theksua më lart, formula për shpallen e fituesve të rinj që do të pranohen në degën e Mjekësisë së Përgjithshme, do të përcaktohet nga treguesit e Maturës Shtetërore, si dhe provimi i pranimit. Ndikimin më të madh në përzgjedhjen e fituesve do e këtë formula aktuale me treguesit e maturës, e cila vlerësohet me 70 për qind të ndikimit, ndërsa testi i informatizuar i pranimit do të ketë vetëm 30 për qind të ndikimit në shpalljen e fituesve të rinj që do të mund të vijojnë studimet në këtë degë.
“Provimi i automatizuar në programin Mjekësi e Përgjithshme, i cili do të ketë 30 për qind peshë në vlerësimin e përgjithshëm, ndërsa 70 për qind do të jetë nga rezultatet e shkollës së mesme përfshirë këtu edhe ato të maturës. Në këtë mënyrë synohet nxitja edhe më shumë e meritokracisë për pranimin në këtë degë, e cila rezulton të jetë edhe një ndër më të kërkuarat në radhët e maturantëve”, bëhet me dije nga MAS.
Vlerësimi i treguesve të shkollës së mesme
Krahas mesatares minimale që duhet për të hyrë në konkurrim për degët e këtij universiteti, janë edhe tre kriteret mbi të cilat do të bazohet përzgjedhja e fituesve të rinj do të pranohen gjatë vitit të ardhshëm akademik. Kriteri i parë ka të bëjë me mesataren e shkollës së mesme që vlerësohet me 30 për qind të ndikimit në shpalljen e fituesve të rinj. Sikundër dhe u theksua më lart, kjo notë përllogaritet si mesatare aritmetike e thjeshtë e notave përfundimtare vjetore të lëndëve për të gjitha vitet e shkollimit në arsimin e mesëm dhe mesatarja aritmetike e thjeshtë e notave të provimeve të maturës.
Kriteri i dytë ka të bëjë me mesataren e provimeve të Maturës Shtetërore 2023, ose maturave të mëparshme. Ky kriter vlerësohet me 40 për qind të ndikimit në shpalljen e fituesve të rinj të këtij viti. Sa i takon këtij treguesi sqarohet se nëse një kandidat jep provim lëndë me zgjedhje: Kimi, Fizikë, Biologji, nota e provimit shumëzohet me 1.4. Nëse një kandidat jep provim lëndë me zgjedhje, të ndryshme nga këto tre lëndë të përcaktuara, nota e provimit shumëzohet me koeficientin 1. Ndërsa riteri i tretë ka të bëjë me mesataren e tre lëndëve formuese që janë: Kimi, Biologji dhe Fizikë. Sipas vendimit të marrë më herët nga Senati Akademik i këtij universiteti, nota mesatare aritmetike e lëndëve formuese (Fizikë, Kimi dhe Biologji), të zhvilluara gjatë tri viteve të shkollës së mesme përbën 30 për qind të ndikimit në shpalljen e fituesve të rinj. Kur lëndët Fizikë, Kimi dhe Biologji janë të vitit të tretë, shumëzohen me koeficient 1.25.
Përfundon plotësimi i Formularit A1
Dita e djeshme ka shënuar edhe përfundimin e afatit të vënë në dispozicion të të gjithë maturantëve në plotësimin e formularit A1, i cili i hap udhë zhvillimit të Maturës Shtetërore të 2023. Sipas grafikut të përcaktuar nga Qendra e Shërbimeve maturantët kanë plotësuar formularin A1, në të cilin kanë listuar tre provimet e detyruara dhe lëndën që do të japin si provim me zgjedhje.
Gjatë javës së ardhshme sistemi online do të hapet për maturantët e vjetër, të cilët do të duhet që të plotësojnë formularin A1Z për t’u rikthyer në garë për studimet e larta gjatë vitit që vjen. Aplikimet e formularit A1Z mund të kryhen nga data 12 dhjetor deri në datën 15 dhjetor 2022 po në të njëjtat orare. Formular A1Z plotësohen fillimisht online nëpërmjet portalit “e-albania” dhe më pas duhet të konfirmohen në shkollën përkatëse nga vetë maturanti/kandidati. Pas plotësimit të formularit bëhet korrigjimi i pasaktësive, sipas një formulari të dërguar në shkollë nga Qendra e Shërbimeve të Arsimit.
FORMULA E KONKURRIMIT PËR UNIVERSITETIN E MJEKËSISË
Mesatarja minimale për të hyrë në garë
Për të konkurruar për studimet e larta në degët Farmaci, Mjekësi i përgjithshme dhe Stomatologji do të mund të hyjnë në garë vetëm maturantët dhe kandidatët e tjerë që kanë notë mesatare të shkollës së mesme nga 8.5 dhe më lart. Ndërsa për të garuar në degët për programet e teknikës dentare dhe higjienist dentar duhet një mesatare mbi notën 7, për degët logopedi, teknik laboratori, teknik imazherie, mami, fizioterapi, infermieri e përgjithshme duhet mesatare e shkollës së mesme mbi notën 7.5, si dhe për degën e shëndetit publik duhet mesatare e gjimnazit mbi notën 8.
Kriteri 1
Kriteri i parë ka të bëjë me mesataren e shkollës së mesme që vlerësohet me 30 për qind të ndikimit në shpalljen e fituesve të rinj. Kjo notë përllogaritet si mesatare aritmetike e thjeshtë e notave përfundimtare vjetore të lëndëve për të gjitha vitet e shkollimit në arsimin e mesëm dhe mesatarja aritmetike e thjeshtë e notave të provimeve të maturës.
Kriteri 2
Kriteri i dytë ka të bëjë me mesataren e provimeve të Maturës Shtetërore 2023, ose maturave të mëparshme. Ky kriter vlerësohet me 40 për qind të ndikimit në shpalljen e fituesve të rinj të këtij viti. Sa i takon këtij treguesi sqarohet se nëse një kandidat jep provim lëndë me zgjedhje: Kimi, Fizikë, Biologji, nota e provimit shumëzohet me 1.4. Nëse një kandidat jep provim lëndë me zgjedhje, të ndryshme nga këto tre lëndë të përcaktuara, nota e provimit shumëzohet me koeficientin 1.
Kriteri 3
Kriteri i tretë ka të bëjë me mesataren e tre lëndëve formuese që janë: Kimi, Biologji dhe Fizikë. Sipas vendimit të marrë më herët nga Senati Akademik i këtij universiteti, nota mesatare aritmetike e lëndëve formuese (Fizikë, Kimi dhe Biologji), të zhvilluara gjatë tri viteve të shkollës së mesme përbën 30 për qind të ndikimit në shpalljen e fituesve të rinj. Kur lëndët Fizikë, Kimi dhe Biologji janë të vitit të tretë, shumëzohen me koeficient 1.25.
Kriteri 4 (vetëm për degën e Mjekësisë)
Maturantët dhe kandidatët që do të duan të vijojnë studimet në degën e Mjekësisë së përgjithshme do të duhet të japin edhe testimin e informatizuar që do të zhvillohet në Qendrën e Shërbimeve të Arsimit, duke nisur nga viti 2023.
