“Ti do qëndrosh edhe pak ditë kryetar, do shikosh çfarë…!” Debati në mbledhje, kush është zyrtari që e dinte për videon e Gjicit

Ish-kryebashkiaku i Kukësit Safet Gjici ishte paralajmëruar pak ditë para skandalit se nuk do të qëndronte gjatë në postin e tij.

Në mbledhjen e 9 qershorit të Këshillit Bashkiak të Kukësit, Gjici ka debatuar me një anëtar të Këshillit, konkretisht Astrit Cengu.

Ky i fundit, ka paralajmëruar Gjicin se ditët e tij në bashki ishin të numëruara.

“Ti do qëndrosh edhe pak ditë kryetar bashkie se do shikosh çfarë do të të bëj!”, kanë qenë fjalët e tij gjatë debatit.

Kjo e ka vënë Gjicin në alert dhe ka filluar të dyshojë. Ai madje ka lajmëruar edhe zyrtarë të tjerë.

Zyrtari Cengu është i një partie tjetër. Kur Gjici ka shkuar në Kukës ky person ka qenë i Partisë Socialiste. Në momentin që Gjici e ka marrë Kukësin në administrim ai është larguar nga PS.

Cengu ka qenë edhe ish-drejtor i OSHEE në Kukës.

Debati mes të dyve ka shpërthyer në mbledhjen e 9 Qershorit. Ky anëtar i Këshillit Bashkiak ka fituar mes 4 anëtarëve të këshillit për të qenë në Këshillin e Qarkut, por Gjici nuk ka pranuar. Në gjaknxehtësi e sipër, kanë bërë debat verbal.

Në Kukës flitej edhe para zgjedhjeve që “kishte diçka” për Gjicin.

Sipas dëshmitarëve, Safet Gjici i ka kujtuar Astrit Cengut se i disponon një dosje voluminoze dhe që mund ta përdorte kundër tij në çdo rast.

Cengu pritet të merret në pyetje nga SPAK.

j.l./ dita