Kur ka kaluar një javë nga atentati mafioz ndaj godinës së televizionit kombëtar “Top Channel”, me pasojë vrasjen e rojës private të sigurisë Pal Kola dhe shkaktimit të dëmeve të shumta materiale, duke rrezikuar edhe jetën e punonjësve të turnit të natës, ende nuk ka persona të identifikuar dhe arrestuar, megjithëse në të dhënat operative janë konfirmuar disa identikite, pjesë e një organizate kriminale të fuqishme. Dyshimet janë se sulmi ka prapavijë politike, në lidhje me linjën editoriale të fundit të televizionit, por ende asnjë provë konkrete. Gjithsesi një prej gjurmëve daktiloskopike që u gjet në mjetin e atentatorëve “Range Rover”, i vjedhur nga një kosovar që pushonte në vitin 2020 në Tale të Lezhës, është dërguar në zyrat e EUROPOL në Lyon të Francës, për ekspertizë të detajuar.
Ngjarjet e fundit kriminale të pazbardhura kanë bërë që edhe Drejtori i Përgjithshëm i Policisë së Shtetit, Muhamet Rrumbullaku, të zbarkojë në zyrën e drejtorit të Policisë së Tiranës, Tonin Vocaj. Burimet bëjnë me dije se në këtë takim po diskutohet ecuria e hetimeve mbi dinamikën e ngjarjeve kriminale, ku dyshohet se pas tyre bëjnë pjesë grupe kriminale me ndikim të lartë.
Pjesë e diskutimit do të jetë edhe ngërçi i shkaktuar për moszbardhjen e këtyre ngjarjeve, ndërsa në takim janë edhe ekspertët e krimeve që po punojnë për zbardhjen e tyre. Sulmi ndaj “Top Channel” dhe atentati në lokalin e Fatjon Muratit në “Don Bosko”, ku u vra një grua e pafajshme, janë dy ngjarjet kriminale që tronditën vendin javët e fundit, atentate që lanë pas edhe dy viktima të pafajshme. Policia nuk ka ende asnjë gjurmë apo provë që mund të çojë në zbardhjen e këtyre dy krimeve të rënda. Ndërkohë, mësohet është duke u diskutuar edhe struktura e re e Policisë së Shtetit, e cila mësohet se ka marrë miratimin nga Ministria e Brendshme dhe pritet që shumë shpejt të hyjë në fuqi. Pjesë e rëndësishme të kësaj strukture janë ngritja e departamenteve të reja që do të luftojnë krimin e organizuar dhe jo vetëm.
