Policia e Himarës ndaloi një 38-vjeçar, pasi dyshohet se kundrejt parave po transportonte emigrantë të paligjshëm për në vendet e BE-së, duke i kaluar tranzit nga Shqipëria. Policia bëri me dije se ka arrestuar në flagrancë shtetasin A. H., banues në Lushnjë, për veprën penale “ndihma për kalim të paligjshëm të kufijve”. I dyshuari konfirmohet se është konstatuar nga shërbimet e Policisë, duke transportuar me automjetin e tij 4 klandestinë, me qëllim kalimin e paligjshëm të kufirit. Në tentativë për t’u larguar me qëllim shmangien e kontrollit nga shërbimet e Policisë, është përplasur me një automjet tjetër, duke shkaktuar dëme materiale. “Gjatë kontrollit fizik ndaj shtetasit A. H., dhe kontrollit në automjetin e tij, u gjetën dhe u sekuestruan një shumë parash (lekë dhe euro), të dyshuara të përfituara nga kjo veprimtari e jashtëligjshme dhe një aparat celular.
Në vijim të veprimeve u shpall në kërkim dhe një shtetas, i dyshuar si bashkëpunëtor për këtë veprimtari kriminale, të dhënat e të cilit, për arsye hetimi nuk bëhen publike. Materialet procedurale i kaluan Prokurorisë pranë Gjykatës së Rrethit Gjyqësor Vlorë, për veprime të mëtejshme”, thuhet në njoftimin zyrtar.
