Tragjedi në “El Monumental”, tifozi bie nga 15 metra, vdes në vend (VIDEO)
Shpërndaje
Një ngjarje tragjike ka ndodhur në stadiumin “El Monumental” të gjigantit argjentinas të futbollit, River Plate. Një tifoz humbi jetën gjatë ndeshjes së kampionatit argjentinas kundër Defense y Justicije. Klubi konfirmoi se tifozi ra nga rreshti i sipërm i tribunës dhe vdiq në vend. Rënia ndodhi nga 15 metra, shkallët e katit të dytë dhe rrethanat po hetohen.
Britmat e tifozëve tërhoqën vëmendjen e arbitrit kryesor, i cili ndaloi menjëherë lojën për të lejuar mjekët të mbërrinin te tifozi. Për fat të keq, ai nuk ia doli t’i mbijetonte plagëve të marra dhe ndërroi jetë. Për futboll nuk bëhej më fjalë dhe ndeshja River-Defensa u ndërpre përfundimisht në minutën e 25’. “Komiteti i Sigurisë së Futbollit dhe CA River Plate me dhimbje ju informojnë se gjatë ndeshjes kundër Defense, një tifoz ka rënë nga tribuna e Sivori Alta dhe ka vdekur në vend. Rënia nuk është paraprirë nga kontakti me një person tjetër. Tribunat u evakuuan pas 30 minutash”, tha River Plate.
