Impakti i Sylvinhos me kombëtaren e Shqipërisë, është shumë pozitiv. Braziliani siguroi dy fitoret e para në stolin e kuqezinjve, të cilët renditen përkohësisht në vendin e dytë të grupit E të eliminatoreve të Euro 2024.
Sukseset 2-0 ndaj Moldavisë dhe 1-3 përballë Ishujve Faroe, kanë rikthyer entuziazmin e munguar te Kombëtarja e Shqipërisë. Loja ka përmirësim dhe rezultatet pozitive po vijnë.
“E kam thënë që në fillim që grupi është i vështirë dhe i ekuilibruar. Por asgjë nuk ndryshon. Jemi të kënaqur për dy fitoret dhe jemi plotësisht në garë për kualifikimin”, deklaroi trajneri për SuperSport pas fitores në Ishujt Faroe.
49-vjeçari ka reaguar me një postim në faqen e tij në “Instagram”, duke shpërndarë meritat e dy sukseseve të fundit, aq të rëndësishme për realizimin e ëndrrës Gjermania 2024.
“Këto kanë qenë ditë intensive dhe shumë produktive pune e përgatitjeje për dy ndeshjet. Ky grumbullim na ndihmoi për të njohur grupin e lojtarëve më në detaje dhe të ushqenim akoma më shumë lidhjen tonë të mrekullueshme.
Rezultati ishte dy fitore, me shifra të rëndësishme. Unë jam i bindur se e gjitha kjo ishte rezultat i punës në grup: lojtarë, staf teknik, punonjës dhe drejtues të Federatës Shqiptare të Futbollit.
Si dhe tifozët, të cilët na mbështetën shumë në fushën tonë dhe na dhanë një energji të mirë për ndeshjen e dytë. Ecim përpara. Forca Shqipëri”, shkruan trajneri brazilian i kombëtares kuqezi.
