Turqia, e cila po përpiqet të sjellë Moskën dhe Kievin në tryezën e bisedimeve në përpjekje për t’i dhënë fund luftës në vazhdim, ka thënë se presidenti rus Vladimir Putin ende nuk është i gatshëm të takohet me homologun e tij ukrainas Volodymyr Zelensky.
Duke folur për mediat lokale, zëdhënësi i presidentit turk, Ibrahim Kalin, tha se presidenti Rexhep Tajip Erdogan ka propozuar një takim midis liderëve të dy vendeve në Turqi në një përpjekje për t’i dhënë fund luftës në vazhdim.
“Zelensky është gati ta bëjë këtë. Putini, nga ana tjetër, beson se palët nuk kanë arritur ende një vizion të përbashkët të mjaftueshëm për të zhvilluar negociata në nivelin e kreut të shtetit,” citohet të ketë thënë Kalin.
Sipas zëdhënësit, në takimin e propozuar nga Erdogan, pika kryesore e fokusit do të jetë një kompromis i mundshëm midis Ukrainës dhe Rusisë, pas së cilës do të vazhdojnë negociatat e detajuara për marrëveshjen.
Kalin tha se Putin, gjatë një bisede me Erdoganin, parashtroi gjashtë pika kryesore, të cilat ishin neutraliteti i Ukrainës dhe refuzimi për t’u bashkuar me NATO-n në të ardhmen; ‘çmilitarizimi’ dhe sigurimi i ndërsjellë i garancive të sigurisë sipas modelit austriak të sigurisë; denazifikimi; heqja e “pengesave” për përdorimin e gjerë të gjuhës ruse; njohja e statusit të “Republikës Popullore të Donetskut”, “Republikës Popullore të Luhanskut”; dhe njohjen e aneksimit të Krimesë nga Rusia.
Sipas zëdhënësit, delegacioni ukrainas diskutoi katër pikat e para me rusët, por nuk është i përgatitur të diskutojë për të pestën dhe të gjashtën, raportoi Ukrayinska Pravda.
Prandaj, Turqia shpreson të organizojë takimin mes Putinit dhe Zelenskit, pas së cilës mund të bëhet përparim i mëtejshëm në negociata.
Kalin tha më tej se as Ukraina dhe as komuniteti botëror nuk ka të ngjarë të bien dakord lehtësisht për njohjen e aneksimit rus të Krimesë dhe rajonit të Donbasit, i cili përfshin Luhansk dhe Donetsk, pasi “kjo është një shkelje flagrante e ligjit ndërkombëtar”.
Ai shtoi se Rusia po përpiqet të negociojë nga një pozicion i forcës, por “nuk duhet harruar se vazhdimi i luftës do të godasë kryesisht ushtrinë dhe ekonominë ruse”.
Më 10 mars, me iniciativën e Turqisë, u zhvillua në Antalia një takim trepalësh i ministrave të jashtëm të Moskës, Kievit dhe Ankarasë. Megjithatë, asnjë përparim nuk u arrit për një armëpushim.
Autoritetet ruse më 16 mars njoftuan gatishmërinë e tyre për të vazhduar negociatat me Ukrainën në formatin trepalësh.
