Një biznesmen u ekzekutua me armë zjarri mbrëmjen e kaluar rreth orës 20:35 në lagjen “Emiri Metraxhiu” në Elbasan.
Edmond Hyka alias Mondi Mahalla, 43 vjeç, u vra me dy plumba në kokë brenda makinës së tij tip “Range Rover”, në karburantin “Xhaxhi Oil” në pronësi të tij, në dalje të Elbasanit.
Bëhet me dije 43-vjeçari gjatë mesjavës që lamë pas ishte përfshirë në konflikt me disa persona, pistë të cilën grupi hetimor po e konsideron si të mundshme në zbardhjen e motivit të ngjarjes.
Gjithashtu, biznesmeni i ekzekutuar ishte edhe pronar i një shërbimi taksi në qytetin e Elbasanit, i quajtur “El Taxi”. 43-vjeçari jetonte në Tiranë, te Komuna e Parisit.
Sipas deklarimeve nga vendngjarja dhe pamjeve të kamerave të sigurisë, biznesmeni sapo kishte dalë nga zyra e karburantit dhe ishte futur në automjetin e tij.
Autorët kanë qëlluar disa herë me pistoletë në drejtim të tij, ndërsa dy prej plumbave e kanë goditur në kokë.
Mondi Mahalla ishte në gjyq për armëmbajtje pa leje, posedim të sendesh të jashtligjshme dhe shpërndarje narkotikësh, ndërsa 1 vit më parë atij i është gjetur shkop gome.
Policia ndërkohë ka njoftuar se një grup i posaçëm hetimor, nën drejtimin e Prokurorisë, ka nisur punën për zbardhjen e rrethanave të krimit dhe dokumentimin e plotë të ngjarjes.
10 persona janë shoqëruar në polici dhe po merren në pyetje lidhur me ekzekutimin e biznesmenit në Elbasan.
