Gjykata ka lënë në burg pronarin e autobusit, në të cilin disa ditë më parë u gjetën dhe u sekuestruan 121 mijë euro të padeklaruara , gjatë një kontrolli në Portin e Durrësit.Ndërsa shoferi që drejtonte mjetin është vënë nën hëtim.
Më shumë se 121 mijë euro të padeklaruara, të fshehura në tavanin e autobusit që vinte nga Bari u sekuestruan në Portin e Durrësit, e për pasojë u arrestua Leonard Nikolli, pronari i firmës ‘Gremel’, ndërsa shoferi Ergys Sadikaj u vu nën hëtim.
Leonard Nikolli është njohur sot me masën e sigurisë, pasi u arrestua për eurot gjetura në autobusin në pronësi të tij, të cilat dyshohet të jenë përfituar nga veprimtaritë kriminale. Sakaq, gjykata ka lënë në burg 44-vjeçarin Nikolli, ndërsa shoferi Ergys Sadikaj është vënë nën hetim në gjendje të lirë.
Si u zbuluan eurot e fshehura në autobus?
Sapo mbërriti me traget në Portin e Durrësit, Policia Kufitare ushtroi kontroll të beftë në autobusin e linjës Bari-Durrës, ku gjeti të fshehura 121 680 euro. Operacioni u zhvillua pas informacioneve se Leonard Nikolli, pronar i linjës së udhëtarëve ‘Gremel’ po transportonte një shumë të majme parash, të padeklaruara. 44-vjeçari Nikolli u prangos, ndërsa shoferi i autobusit, Ergys Sadikaj, po hetohet në gjendje të lirë.
Gjatë kontrollit të ushtruar në autobusin e ‘Gremel’, që po kthehej nga Italia, policia ka gjetur të fshehura në tavanin e mjetit 121 680 euro, të cilat dyshohet se janë përfituar nga veprimtaritë kriminale. Burime për Report Tv bëjnë me dije se shoferi i autobusit ka deklaruar në Polici se nuk ka pasur dijeni për eurot që ishin të fshehura në tavan, të cilat sipas ligjeve në fuqi duhej të ishin deklaruar.
