Gjykata e Apelit la në fuqi vendimin e marrë nga Gjykata e Lezhës në vitin 2022, për Agron Manukën dhe Imer Loshën, të akuzuar si pjesë e një grupi të trafikimit të bombave me telekomandë. Manuka u dënua me 10 vite burg, ndërsa Losha me 8 vite, pasi të dy u kapën në rrugën nacionale Milot-Lezhë, teksa po udhëtonin drejt Shkodrës me një makinë të mbushur me eksploziv. Brenda çantës u gjetën 30 kallëpe C4, një eksploziv i fuqishëm dhe 17 kapsolla detonatore.
Agron Manuka, 42 vjeç, banues në Durrës dhe Imer Losha, 46 vjeç, banues në Dibër, u arrestuan në 24 nëntor të vitit 2021, në aksin e vjetër Milot-Lezhë, teksa po udhëtonin drejt Shkodrës me një makinë të mbushur me eksploziv. Brenda çantës u gjetën 30 kallëpe C4, një eksploziv i fuqishëm dhe 17 kapsolla detonatorë. Dyshohet se eksplozivi C4 do u dërgohej grupeve kriminale që veprojnë në qarkun e Shkodrës. Por në dëshminë e tyre gjatë seancës në gjykatën e Lezhës, dy të arrestuarit mohuan akuzat. Manuka u shpreh se minat shpërthyese i duheshin pasi punonte si minator në Martanesh. Ndërsa i akuzuari tjetër, Imer Losha u justifikua duke thënë se ishte thjesht taksist dhe nuk kishte dijeni mbi atë çfarë po transportonte.
