Policia e Vlorës ka mundur të zbardhë ngjarjen e ndodhur mëngjesin e të martës në lagjen “Pavarësia”, ku u dogjën qëllimisht 3 automjete të parkuara.
Hetimet e thelluara çuan në identifikimin dhe arrestimin në flagrance të 2 prej autorëve të dyshuar, njëri prej tyre porositësi dhe tjetri zjarrvënësi.
Gjithashtu, u shpall në kërkim shtetasi E. L., 41 vjeç, banues në Vlorë dhe vijon puna për kapjen e tij.
“Nga hetimet dyshohet se shtetasi J. Ç. ka bashkëpunuar me 2 shtetasit e tjerë, për djegien e 3 automjeteve, për motive të cilat nuk mund të bëhen me dije duke qenë se hetimi vijon. Shtetasi E. L. ka siguruar lëndën djegëse, ndërsa shtetasi K. Y. ka kryer zjarrvënien”, njofton policia e Vlorës.
Materiale procedurale në ngarkim të tre personave të përfshirë i kaluan Prokurorisë së Vlorës, për veprime të mëtejshme.
