Treguesit më të fundit të tregut të punës të publikuara nga Instituti i Statistikave tregojnë se shkalla zyrtare e papunësisë në vendin tonë gjatë tremujorit të parë të vitit 2022 ka zbritur në 11.3% Krahasuar me një vit më parë shkalla zyrtare e papunësisë u ul me 0.6 pikë përqindje, ndërsa krahasuar me tremujorin paraardhës ka rënë me 0.1 pikë përqindje. Por si paraqitet ky tregues te të rinjtë?
Shkalla zyrtare e papunësisë për grupmoshën 15 deri 29 vjeç është rritur me 0.1 pikë, paçka se në terma vjetor regjistron rënie. Shkalla më e lartë e papunësisë vijon të regjistrohet pikërisht te kjo grupmoshë dhe për tremujorin e parë të vitit 2022 është 20,7 %. Në terma gjinorë, sipas shifrave, shkalla zyrtare e papunësisë për burrat është 11,0 % dhe për gratë 11,7 %. Krahasuar me të njëjtin tremujor të vitit 2021, shkalla e papunësisë është ulur me 0,7 pikë përqindje për burrat dhe me 0,4 pikë përqindje për gratë.
Nga ana tjetër, nëse do të flisnim për shifrat e punësimit, Instituti i Statistikave sinjalizon se përgjatë tremujorit të parë të këtij viti shkalla e punësimit për popullsinë 15-64 vjeç është 63.5% Të dhënat tregojnë se ritmi vjetor i ndryshimit të punësimit paraqitet pozitiv. Shkalla e punësimit për popullsinë 15 vjeç e lart është rritur me 2.3 pikë përqindje. Ky tregues ka pësuar rritje edhe nëse do ta krahasonim me tremujorin paraardhës pra tremujorin e katërt të vitit 2021.
Pozitiv është fakti se shkalla e punësimit te të rinjtë ka pësuar rritje po ashtu dhe për tremujorin e parë të vitit regjistrohet 43.7% nga 38.9% që regjistrohej në të njëjtën periudhë të një vitit më parë. Në terma gjinorë shkalla e punësimit për burrat e grup-moshës 15-64 vjeç është 70,8 %, ndërsa për gratë është 56,6 %./scan
o.j/dita
